Olımpıada debútanty Nurbek Oralbaı 80 keli salmaqta synǵa tústi.
Elorda áýejaıyna Parıjdegi Olımpıada oıyndarynyń kúmis júldegeri Nurbek Oralbaı keldi, dep habarlaıdy aqshamnews.kz
Nurbek úshin Parıj alǵashqy Olımpıada boldy. Ol eń qıyny fınaldyq shaıqas bolǵanyn aıtty.
"Men bar tájirıbem men sheberligimdi, qolymnan kelgenniń bárin jasadym, biraq meniń qarsylasym myqtyraq bolyp shyqty, bul sport jáne árqashanda jeńetin de, jeńiletin de bolady",-dedi sportshy.
Áýejaıda sportshyny Qazaqstannyń týy men plakattary bar ondaǵan adam kútip aldy. Ol barlyǵyna qoltańba berdi: adamdar plakattarǵa, dápterge, jalaýlarǵa, boks qolǵaptaryna, tipti qoldaryna qoltańba qoıýdy surady.
"Bala kezimnen sportpen aınalystym, Olımpıada chempıony bolýdy armandadym. Bul biz úshin basty motıvasıa boldy. Bul joly bolmady, biraq kelesi oıyndarda osy maqsatqa jetý úshin bar kúshimizdi salamyz",-dedi Nurbek Oralbaı.