Tórtkúl dúnıeni tik turǵyzyp, teledıdarǵa telmirtken 4 jyldyqtyń basty básekesi de óz máresine jetti.
Taǵy bir eske sala keteıik, Parıjde ótken XXXIII Olımpıadada elimizdiń sportshylary 1 altyn, 3 kúmis, 3 qola júlde oljalap, komandalyq esepte 43-shi oryndy ıelendi. Endi alda Paralımpıada oıyndary jalaýyn jelbiretedi. Erekshe jandar arasyndaǵy doda 28 tamyz ben 8 qyrkúıek aralyǵynda ótedi dep josparlanǵan. Qazaqstan qorjynynda sporttyń 9 túrinen 33 lısenzıa bar.
Atap aıtar bolsaq, para dzúdodan 10, paýerlıftıngten 5, para jeńil atletıka, júzý jáne taekvondodan tórteýden bar. Al para kanoe men oq atýdan 2 lısenzıadan, al otyryp oınaıtyn voleıbol men ústel tenısinen bir-bir joldamadan bar. Aıta ketý kerek, Tokıo-2020 Paralımpıadasyna Qazaqstan ulttyq quramasynyń 25 sportshysy qatysyp, 5 medal, ıaǵnı 1 altyn, 3 kúmis jáne 1 qola medal jeńip aldy. Nátıjesinde elimiz jalpykomandalyq esepte 48-shi orynnan kórindi.