Meshitte adam kóp bolǵan
Pákistannyń Peshavar qalasynda (Aýǵanstanmen shekaraǵa jaqyn Haıber-Pahtýnhva soltústik-batys provınsıasy) meshitte bolǵan jarylys saldarynan mert bolǵandardyń deni – kúsh qurylymdarynyń qyzmetkerleri. Bul týraly Pákistan İshki ister mınıstrliginiń basshysy Rana Sanaýlla Ulttyq jıyn aldynda málimdedi. Ol ARIA News telearnasynan kórsetildi, dep habarlaıdy Almaty-akshamy.kz QazAqparatqa silteme jasap.
«Terakt saldarynan 97 polıseı men 3 qarapaıym azamat qaza tapty», - dedi Sanaýlla.
Peshavara qalasynda dúısenbi kúni bolǵan jarylystan mert bolǵandar sany 100-ge jetip, jaraqat alǵandar 200-den asty.
Ulttyq qaýipsizdik organy qyzmetkerleriniń aqparatyna sáıkes, jankeshti lańkes jarylǵysh zatty meshitke besin namazy kezinde iske qosqan. Sol sátte meshitte adam kóp bolǵan, onyń ishinde polısıa qyzmetkerleri men áskerıler bar.
Buǵan deıin habarlanǵandaı, ledı Redıng atyndaǵy Peshavar aýrýhanasynda tótenshe jaǵdaı jarıalandy – onda jaraqat alǵandar kóptep túsip jatyr, kóbiniń jaǵdaıy aýyr, medısına qyzmetkerleri donorlardan qan tapsyrýdy suraıdy.
Qazaqstan Prezıdenti Qasym-Jomart Toqaev Pákistan Prezıdenti Arıf Alvı men Premer-mınıstri Shahbaz Sharıfke kóńil aıtý jedelhatyn joldady.
Memleket basshysy Peshavar qalasyndaǵy meshitte bolǵan lańkestik áreket saldarynan kóptegen adamnyń qaza tapqany jáne zardap shekkeni týraly sýyt habardy tereń kúızelispen qabyl alǵanyn jetkizdi.