«Ózin-ózi taný» sabaǵyn baǵdarlamalar tiziminen alyp tastaý usynystary túsýde
QR Bilim jáne ǵylym mınıstrligi «Ózin-ózi taný» pánine qatysty mınıstrlik ókilderiniń kózqarasy týraly málim etti, dep habarlaıdy Almaty-akshamy.kz QazAqparatqa silteme jasap.
Mınıstrliktiń baspasóz qyzmetiniń habarlaýynsha, Bilim jáne ǵylym mınıstrligine bul pándi bilim baǵdarlamalary tiziminen shyǵarý týraly usynystar kelip túsip jatqany ras.
Qazirgi ýaqytta QR BǴM Ulttyq bilim akademıasy atalǵan mindetti pándi mektepterde kelesi oqý jylynan bastap fakúltatıvtik sanatqa aýystyrý boıynsha joba engizdi. Iaǵnı, qyrkúıekten bastap «Ózin-ózi taný» pánin burynǵydaı 1-11 synyptar emes, tek bir synypta ǵana oqýshylardyń tańdaýy boıynsha oqytý josparlanyp jatyr.
«Pándi fakúltatıvtik tizbege aýystyrý boıynsha jumys oqý baǵdarlamalaryn jańartý jáne bilim alýshylardyń oqý júktemesin azaıtý jónindegi sharalar sheńberinde júrgiziletin bolady», - delingen mınıstrliktiń habarlamasynda.