Ózin-ózi qumar oıyndardan shekteý merzimi 10 jylǵa uzartyldy

Avtor aqshamnews.kz
17:20, 04 jeltoqsan 2024

Sýret: Kazgazeta.kz

Buǵan deıin azamattar ózin qumar oıyndardan 6 aıdan 12 aıǵa deıingi merzimge shekteı alatyn. Endi bul merzim 10 jylǵa deıin uzartyldy.

Qyzmetti eGov mobile qosymshasy arqyly paıdalanýǵa bolady, dep habarlaıdy aqshamnews.kz.

Týrızm jáne sport mınıstrliginiń málimetinshe, atalǵan qyzmet ótinimderdi óńdeý ýaqytyn qysqartýǵa jáne ózin qumar oıyndardan shekteý júıesin jeńildetýge múmkindik beredi. Bul kez kelgen azamatqa barlyq lısenzıalanǵan oıyn alańdary men onlaın býkmekerlik platformalarǵa kirýdi shekteýge múmkindik beredi.

Aıta keteıik, qyzmet tek 21 jastan asqan adamdar úshin qoljetimdi.

Qyzmetti paıdalaný úshin mynadaı qadamdar jasaý qajet:

eGov mobile qosymshasyna kirip, «Qyzmetter» → «Sport» bólimin tańdańyz;
«Qumar oıyndarǵa jáne (nemese) bás tigýge qatysýǵa shekteý qoıý» qyzmetin tańdańyz;
Shekteýdiń aıaqtalý jylyn jáne aıyn kórsetip, «Qyzmetke tapsyrys berý» batyrmasyn basyńyz;
Ótinishke Face ID/Touch ID arqyly qol qoıyńyz.

Ótinish bergennen keıin qoldanýshy qumar oıyndarǵa qatysýǵa shekteý qoıylǵan tulǵalar tizimine avtomatty túrde engiziledi jáne ótinish keri qaıtarylmaıdy. Buǵan deıin shekteý qoıǵandar úshin merzimdi uzartý múmkindigi de bar.

Jańartylǵan qyzmet QR Sıfrlyq damý, ınovasıalar jáne aeroǵarysh ónerkásibi mınıstrligi Memlekettik kórsetiletin qyzmetter komıteti, «Ulttyq aqparattyq tehnologıalar» AQ jáne Týrızm jáne sport mınıstrligi Oıyn bıznesin jáne lotereıany retteý komıtetimen birlesken jumysynyń nátıjesinde engizildi.

Búginge deıin 173 868 adam ózin qumar oıyndardan shektegen.