Ne baıqadyńyz?
Shaǵyn marketke kirsem, kasa aldynda móldir selofanmen qaptalǵan Georgıı lentalary jatyr eken. Qazaqsha. 9 mamyr dep jazylǵan tusynda basyna pılotka kıgen búldirshinniń sýreti tur móldirep.
– Bul ne, satyla ma? – dep suradym satýshy qyzdan.
– Iá. 360 teńge.
– Alyp jatyr ma jurt?
– Iá, mektep, balabaqshalar alyp jatyr.
Oılanyp qaldym. Biz áli Georgıı lentasyn taǵyp júrmiz be sonda?
Bıyl Uly Jeńiske 78 jyl tolady. Az ýaqyt emes. Ýaqyt ýysta turmaıdy, zyrǵyp aǵyp jatyr. Ardager atalarymyzdyń qatary da kúnnen kúnge sırep barady. Almatynyń ózinde 56 ardager ata ǵana qalypty kózi tiri. Al bizge osynaý beıbit kúndi syılaǵan batyrlar erligin búgingi urpaq umytpaýǵa tıis.
Iá, jylda Jeńis kúni keýdemizge sol kúnniń belgisi retinde birazǵa deıin sarǵylt-qara jolaqty Georgıı lentasyn taǵyp kelgenimiz ras. Bul lenta Reseı ımperıasynda HVIII ǵasyrdan bastap áýlıe Georgıı, Georgıı kresi ordenderinde qoldanylǵan eken. Onyń aldynda reseılik matrostar bas kıimindegi kresiń ústine taqqan. Keıin ýaqyt óte bul 1945 jylǵy 9 mamyrdaǵy Jeńistiń sımvolyna aınalyp shyǵa keldi. Uly Jeńisti Reseı osy sarǵylt-qara lenta arqyly tek bir ózine ǵana teligisi keletindeı. Al sol Jeńiste bizdiń atalarymyzdyń da úlesi, qany, jany bar! Sondyqtan bolar, bul lenta qoǵamda biraz daý týdyryp, qarsy shyqqandar az bolmaǵan. Nátıjesinde sarǵylt, qara tústi Georgıı lentasynyń ornyn basqan ózimizdiń qazaqy oıýmen kómkerilgen, Týymyz tústes «Jeńis» lentasy jasaldy. Byltyr Almaty qalasynyń ákimdigi osyndaı 20 myń «Jeńis» lentasyn daıyndap, qala turǵyndaryna taratqan bolatyn.
Bul lenta jaı shúberek emes, ony atalarymyzdyń qan maıdanda tógilgen qany men jeńis úshin dep alǵa umtylǵanda tamshylaǵan mańdaı teriniń belgisi hám jas urpaqtyń tarıhqa qurmeti dep tanýymyz kerek. Ol – ár ulannyń keýdesinde jelbirep, olardyń patrıottyq sezimin oıatýǵa qaýqary bar otanshyldyqtyń bir belgisi! Sondyqtan ózgeniń emes, ózimizdiń Jeńis lentasyn taǵaıyq!