Halyq qashannan saılaýǵa zor úmitpen barady. Ózi tańdaǵan úmitkerine daýys bere otyryp, amanatyna adal bolsa dep senim artady. Árıne, halyqtyń oılaǵany dáıim bola bermesi anyq. Degenmen, saılaýshylarynyń seniminen shyǵyp, bergen ýádesine sáıkes óz baǵdarlamasyn júzege asyryp júrgen Dýlat Tastekeı az ýaqyttyń ishinde biraz sharýanyń basyn qaıyrdy. Ózi saılanǵan Jetisý aýdanyna qarasty No18 saılaý okrýgi boıynsha atalmysh aýdannyń birshama joǵy túgendelip, jyrtyǵy jamalyp jatyr. Almaty qalasy Máslıhatynyń depýtaty Dýlat Tastekeı №112 jalpy bilim beretin mektepte taǵy da halyqpen kezdesti.
Bul joly da turǵyndar biraz ózekti máseleniń basyn ashty. Bul mańaıda qańǵybas ıtterdiń tym kóbeıip ketýi ásirese balalardyń ómiri úshin qorqynyshqa aınalǵanyn jekizdi. Mektepten qaıtqan balalary úshin qatty alańdaıtynyn aıtyp, depýtattan arasha surady. Qańǵybas ıtter máselesi boıynsha kezdesýge ádeıi shaqyrylǵan Almaty qalasynyń «Qalalyq veterınarıa qyzmeti» komýnaldyq memlekettik qazynalyq kásiporny dırektorynyń mindetin atqarýshy M.Madıarov qańǵybas ıtterdi aýlaý, úı janýarlaryna veterınarlyq qyzmet kórsetý boıynsha qoıylǵan saýaldarǵa jaýap berip, qańǵybas ıtterdi aýlaıtyn arnaıy ortalyq mamandaryna tapsyrma berdi. Kezdesý barysynda kóterilgen taǵy bir ózekti másele- kóshelerdegi shuńqyrlar, jumysy bitpeı qoıǵan jóndeý jumystary týraly boldy.
Sonymen qatar, turǵyndar bul mańaıda balalarǵa arnalǵan sporttyq-saýyqtyrý ortalyqtary men klýbtyń joq ekenin de ashyna aıtty. Dál osy aýmaqta áli kúnge deıin qoǵamdyq kóliktiń az qatynaıtyny, onyń jumys sapasynyń nashar ekeni de áńgimege arqaý boldy.
Turǵyndardyń budan da ózge máseleleri boıynsha Máslıhat depýtaty Qazaqstan Respýblıkasynyń zańnamasyna sáıkes túsindirme berdi. Sonymen qatar, keıbir máselelerdi odan ári sheshýge yqpal etý úshin depýtattyq saýal joldap, ony jeke baqylaýǵa alýǵa ýáde berdi. Turǵyndar tarapynan túsken ótinishterdiń oryndalýy úshin tıisti sala qyzmetkerlerine birqatar tapsyrmalar berdi. Osy jolǵy kezdesýge depýtat bos kelmeı, mektep ujymyna oqýshy oryndyqtaryn syıǵa tartty. Atalmysh mekteptiń keńeıtip, qosymsha ǵımarat salý jumysyn tikeleı ózi qadaǵalaıtyn boldy. Turǵyndardyń saýaldaryn oryndalý nátıjeleri týraly áleýmettik jelidegi paraqshasynda habarlaıtyn bolady.