Búgin Atyraýda Ulttyq quryltaıdyń úshinshi otyrysy sheńberinde jumys seksıalarynyń máslıhattary ótti.
Túske deıin QR Prezıdentiniń kómekshisi Rýslan Jeldibaıdyń moderatorlyq etýimen «Azamattyq qoǵam» seksıasy, sondaı-aq Mádenıet jáne aqparat mınıstri Aıda Balaevanyń moderatorlyǵymen «Mádenıet. Óner. Rýhanıat» seksıasy jumys istedi.
Al tústen keıin Premer-Mınıstrdiń orynbasary Tamara Dúısenovanyń jetekshiligimen «Áleýmettik-ekonomıkalyq jáne aımaqtyq damý» seksıasynyń, Ǵylym jáne joǵary bilim mınıstri Saıasat Nurbektiń moderatorlyq jasaýymen «Bilim jáne ǵylym» seksıasynyń otyrysy ótti.
Jalpy alǵanda, tórt seksıanyń jumysynda Ulttyq quryltaıdyń 70-ke jýyq múshesi sóz sóılep, 100-den asa usynys pen bastama kóterildi.
Seksıalarda aıtylǵan usynystardyń basym bóligi qoǵam birligin odan ári nyǵaıtýǵa, jalpyulttyq qundylyqtardy dáripteýge, eldiń ǵylymı áleýetin kóterýge, mádenıet salasyn qoldaýǵa, jergilikti ózin-ózi basqarý júıesin damytýǵa, kóshi-qon máselesin retteýge jáne qoǵamdaǵy ózge de ózekti máselelerge qatysty jasaldy.
Ulttyq quryltaı músheleriniń mundaı belsendi qyzmeti atalǵan azamattyq ınstıtýttyń qoǵam men memleket arasynda tıimdi dıalog alańyna aınalǵanyn kórsetedi.