Úkimet jumysynyń ádisi túbegeıli ózgeredi.
Ózbekstan Prezıdenti Shavkat Mırzıóev el Parlamentine jasaǵan joldaýynda mınıstrlikter men vedomstvolardyń sany 61-den 28-ge deıin qysqaratynyn aıtty, dep habarlaıdy Almaty-akshamy.kz Gazeta.uz silteme jasap.
«Birinshi kezeńde mınıstrlikter reformalanady, Úkimet jumysynyń ádisi de túbegeıli ózgeredi. Eń aldymen, mınıstrlikter men vedomstvolardyń sany qazirgi 61-den 28-ge deıin qysqartylatyn bolady. Endi árbir mınıstrlik tıisti salada memlekettik saıasatty júzege asyrýǵa, sondaı-aq qurylymǵa kiretin komıtetterdi, agenttikter men ınspeksıalardy basqarýǵa jaýapty bolady», - dedi Ózbekstan prezıdenti.
Ózbekstan basshysy memlekettik basqarýdyń shaǵyn ári tıimdi júıesine kóshýdi usyndy.
«Nelikten men sózimdi osy baǵyttaǵy reformadan bastap otyrmyn? Buryn joıylyp ketý aldynda turǵan salalardy aıaǵyna kóterý úshin alty jyl ishinde jańa mınıstrlikter men vedomstvolar qurý qajet boldy. Olaı istemesek, qazir jetken jetistigimizge qol jetkize almas edik», - dep túsindirdi Prezıdent.
Onyń aıtýynsha, Ózbekstan mektepke deıingi bilim berý, turǵyn úı-kommýnaldyq sharýashylyq, ınvestısıalar, komýnaldyq qyzmetter, memlekettik-jekeshelik áriptestik salalarynda "úlken nátıjelerge qol jetkizdi".
Mırzıóev jeke bastamany keńeıtý men oǵan jańa múmkindikterdi ashý qajet ekenin atap ótti. Endi, ol atap ótkendeı, qolmen basqarýdan naqty nátıjege jumys isteıtin júıelik basqarýǵa kóshýdiń ýaqyty keldi.
«Qazirgi ýaqytta memlekettik apparatta kóptegen qaıtalanatyn [fýnksıalar] bar, qajetsiz basqarmalar bar dep ashyq aıtý kerek. Oǵan qosa ortalyqtandyrýdyń deńgeıi tym joǵary. Nátıjesinde, búgingi kúnniń kúrdeli máseleleriniń durys sheshimin tabýǵa kóp ýaqyt, kúsh pen jiger jumsalady. [Másele] aýdannan Prezıdentke jetý úshin qansha ýaqyt qajet? Ózimiz elestetip kóreıik. Búrokratıa bizdiń aıaǵymyzdy baılaıtyn shyrmaýyqqa aınaldy. Mınıstrlerdiń, bylaısha aıtqanda, Úkimet qabyldaǵan sheshimderde daýysy joq. Iaǵnı, olardyń osy sheshimderdi daıyndaýǵa jáne iske asyrýǵa qatysýy men jaýapkershiligi jetkiliksiz», - dep qosty Mırzıóev.