1 sáýirden beri Ózbekstan Syrdarıa ózeni arqyly Qazaqstanǵa 3,9 mlrd tekshe metr sý jiberdi.
Osyǵan deıin Sý resýrstary jáne ırrıgasıa mınıstri Nurjan Nurjigitov Ózbekstanmen jarty jyl ishinde Qazaqstanǵa Syrdarıa ózeni arqyly 3,7 mlrd tekshe metr sý jiberý týraly mámilege kelgen bolatyn. Nátıjesinde ózbek tarapy kelisilgen sý kólemin 4 aıda jiberdi, dep habarlaıdy almaty-akshamy.kz Sý resýrstary jáne ırrıgasıa mınıstrligine silteme jasap.
Sýarý kezeńiniń sońyna deıin Ózbekstan Qazaqstanǵa taǵy 1 mlrd tekshe metr sý jiberedi dep kútilýde. Bul elimizdiń ońtústik óńirlerindegi sharýalardyń sýarmaly sýǵa suranysyn tolyq qanaǵattandyrýǵa múmkindik beredi.
Búgingi tańda Shardara sý qoımasynda 2,6 mlrd tekshe metr sý bar, bul ótken jylmen salystyrǵanda 689 mln tekshe metrge artyq. Shardara sý qoımasyna jalpy kólemi 3,9 mlrd tekshe metr sý keldi.
Óz kezeginde Shardara sý qoımasynan Syrdarıa ózeniniń tómengi aǵysyna 3,6 mlrd tekshe metr sý jiberildi. Bul byltyrǵy kórsetkishke qaraǵanda 950 mln tekshe metrge artyq. Qyzylqum kanalyna 700 mln tekshe metr sý, al 400 mln tekshe metr Soltústik Aral teńizine jiberildi.
«Kórshilerimizben Toqtoǵul jáne Bahrı-Tochık sý qoımalarynyń jumys kestesin aldyn ala kelisýdiń nátıjesinde «Dostyq» memleketaralyq kanalynyń qazaqstandyq bóligine sý turaqty túrde kelýde. Qazir atalǵan kanal arqyly elimizge sekýndyna 90 tekshe metr sý keledi. Bul Túrkistan oblysynyń sharýalaryn sýarmaly sýmen tolyq qamtamasyz etý úshin jetkilikti», - dedi Sý resýrstary jáne ırrıgasıa mınıstrliginiń resmı ókili Móldir Ábdýalıeva.