Bıyl festıválge birden úsh juldyzdy hedlaıner qatysady.
Comic Con Astana uıymdastyrýshylary Ortalyq Azıadaǵy eń iri gık-mádenıet festıvaline qatysýshylarynyń esimin jarıalaýdy jalǵastyrýda, dep habarlaıdy aqshamnews.kz.
Endı Serkısten keıin hedlaınerler qataryna áıgili amerıkalyq akter Esaı Morales qosyldy. Ol «Ozark» jáne «Tıtandar» serıalyndaǵy rólderimen, sondaı-aq Tom Krýzben birge túsken «Mısıa nevypolnıma» franshızasynyń sońǵy eki bólimindegi sheberligimen tanymal.
Esaı Morales – kópqyrly mansabymen tanymal gollıvýdtyq juldyz. Onyń akterlik joly 40 jyldy qamtıdy. Ol úlken ekranda 1980-jyldary debút jasap, kúltke aınalǵan «La Bamba» fılminde Rıchı Valenstyń aǵasynyń róli arqyly keń tanymal boldy. Osy jyldar ishinde Morales ózin drama janryndaǵy tereń rólderden bastap dáleldep, harızmasy joǵary zulym keıipkerlerge deıin somdaı alatynyn baıqatty. Osylaısha, sırek kezdesetin dıapazondaǵy akter retinde qalyptasty. Qalyń kórermenge ol Netflix platformasyndaǵy tanymal «Ozark» serıalyndaǵy antagonıst Kamıno Del Rıonyń róli arqyly da belgili. Al DC sýperqaharmandyq áleminde Morales «Tıtandar» serıalynda Sleıd Ýılson (Defstroýk) beınesin somdaǵan.
Sońǵy jarqyn jobalarynyń biri – Morales basty antagonıst Gabrıel rólin somdaǵan «Mısıa nevypolnıma» boldy. Ol – Itan Hanttyń (Tom Krýz) harızmasy joǵary qarsylasy. Osy róli arqyly Esaı úlken ekrandaǵy eń áserli zulym keıipkerlerdiń biri ekenin taǵy bir márte kórsetti.
Akter qatysqan basqa da jobalar qatarynda mynadaı serıaldar bar: «Ot zakata do rassveta», «Kak ızbejat nakazanıa za ýbııstvo», «Kaprıka», «Ierıhon», «C.S.I.: Maıamı», «Baıkı ız sklepa», «Sýmerechnaıa zona», «Za granú vozmojnogo», «Ognennyı sezon», «Moıa semá», «Nasıa fastfýda» fılmderi, taǵy basqalary.
2025 jyly Comic Con Astana baǵdarlamasyn jáne qonaqtarynyń geografıasyn keńeıtip qana qoımaı, óz tarıhynda alǵash ret úsh hedlaınerdi birden jarıalamaq. Úshinshi ártistiń esimin uıymdastyrýshylar jaqyn kúnderi habarlaıtyn bolady.
İs-shara bes kúnge sozylyp (9-dan 13 shildege deıin) alǵash ret eki iri alańda ótedi: «Astana-Arena» stadıony men MLD «Barys-Arena».
Condaı-aq, 2025 jylǵy festıváldiń hedlaıneri – brıtanıalyq akter, rejıser jáne sıfrlyq keıipkerlerdi ekranǵa shyǵarý salasyndaǵy jańashyl adam Endı Serkıs. Ol – qozǵalysty túsirý tehnologıalaryn damytý arqyly kıno ındýstrıasynda tóńkeris jasaǵan tulǵa. Ártúrli jyldary Comic Con Astana hedlaınerleri retinde álemdik ındýstrıanyń tanymal juldyzdary óner kórsetken, olardyń arasynda Mads Mıkkelsen, Pılý Asbek, Maıkl Rýker, Shon Gann, Persı Haıns Ýaıt jáne basqalar bar.
Festıvál «Astana Tourism» JSHS Týrızmdi damytý ortalyǵynyń qoldaýymen ótedi.
Festıvál aıasynda kóptegen taqyryptyq aımaqtar men jarqyn seriktestik ıntegrasıalar usynylady. Árbir aımaq qonaqtarǵa erekshe áser men umytylmas tájirıbe syılamaq.
Festıválge jyldam tamaqtaný jelisi I’M qaıta oralady. Bıylǵy jyldyń gastronomıalyq jańalyǵy – shyryndy french-dog alǵash ret festıvál alańynda usynylady.
Perfetti Van Melle kompanıasy atynan aty ańyzǵa aınalǵan Chupa Chups brendi qatysady. Brend aımaǵynda qonaqtardy Chupa Chups stılindegi áserli ınstallásıalar kútedi. Ol – qatysýshylarǵa sapaly ári kórkem fotolar jasaýǵa taptyrmas múmkindik. Buǵan qosa árbir adamdy baqyt pen balalyq shaqtyń dámin eske túsiretin túrli syılyqtar men tosynsyılar kútedi.