Memlekettik qýyrshaq teatrynyń ártisteri 3-4 shildede Kanada kórermenderine «Romeo jáne Djýletta» qoıylymyn usynady. 88-shi teatr maýsymyn aıaqtaǵan teatr ujymy Ottavada ótetin The First international Ottawa Puppet festıvaline qatysty, dep habarlaıdy almaty-akshamy.kz
Búgin Kanadadan súıinshi habar jetti.
Memlekettik qýyrshaq teatrynyń qoıǵan «Romeo men Djýletta» qoıylymy úzdik dep tanylyp, GRAN_PRI júldesine ıe boldy, dep jazylǵan habarlamada.
Eske salsaq, Kanadalyq festıválge qatysý úshin Qýyrshaq teatry óziniń repertýarynan «Romeo men Djýletta» spektaklin tańdaǵan bolatyn. Onyń rejıseri – Dına Jumabaeva. Shyǵarmashylyq toptyń sheberligi men biliktiliginiń arqasynda dál osy qoıylym buǵan deıin de bedeldi respýblıkalyq jáne halyqaralyq festıváldarda kóptegen marapatqa ıe boldy. Máselen, Bolgarıada ótken «Altyn delfın» Halyqaralyq teatr festıvalinde «Gran-Prı», «Úzdik er adam róli» jáne «Úzdik debút» syılyqtaryn jáne «Syn - shyn bolsyn» respýblıkalyq teatr festıvalinde «Gran-Prı» jeńip alǵan edi.
Aıta keteıik, Qýyrshaq teatry – kanadalyq kórermender aldynda óner kórsetetin Qazaqstannyń alǵashqy teatry.