Byltyr ulttyq parkterge 2 mln-nan asa adam barǵan.
Bul týraly BAQ ókilderiniń qatysýymen ótken brıfıńide Ekologıa mınıstrliginiń Orman sharýashylyǵy jáne janýarlar dúnıesi komıteti tóraǵasynyń orynbasary Danıar Turǵambaev aıtty, dep habarlaıdy Almaty-akshamy.kz QazAqparatqa silteme jasap.
«Byltyr erekshe qorǵalatyn tabıǵı aýmaqta baqylaý-ınspeksıalyq qyzmet sheńberinde 2 992 reıd júrgizilip 44 quqyq buzýshylyq anyqtaldy. Nátıjesinde 655 adamǵa 640 mln teńge kóleminde aıyppul salyndy», - dep málim etti Danıar Turǵambaev.
Sonymen qatar, onyń aıtýynsha, ótken jyly ulttyq parkterge kelýshiler sany 2 mln asty. Bul 2021 jylmen salystyrǵanda 25%-ǵa kóp.
«Erekshe qorǵalatyn tabıǵı aýmaqtardy paıdalanǵany úshin tólemaqy jınaýdyń ashyqtyǵyn qamtamasyz etý jáne sybaılas jemqorlyq táýekelderin azaıtý maqsatynda ulttyq parkterdiń baqylaý-ótkizý pýnktterin avtomattandyrý boıynsha jumystar júrgizilýde. «Kólsaı kólderi» ulttyq parkinde «Kólsaı» baqylaý-ótkizý pýnkti avtomattandyryldy, sondaı-aq tólemderdi qabyldaýdyń ıntegrasıalanǵan júıesimen jańa saıt ázirlendi. Atalǵan jumystyń qorytyndysy boıynsha osy tásildi barlyq ulttyq parkterge engizý múmkindigi qarastyrylýda. Bıyl İle-Alataýy, Sharyn jáne Baıanaýyl ulttyq parkterinde baqylaý-ótkizý pýnktterin avtomattandyrý josparlanýda», - dep bólisti komıtet tóraǵasynyń orynbasary.