Almaty polısıasy oıyn-saýyq oryndarynda qaýipsizdikti kúsheıtý qajettigin málimdedi
Almaty qalasynyń polısıasy qylmys jıi tirkeletin oıyn-saýyq oryndaryn anyqtap, olardyń qaýipsizdik sharalaryn kúsheıtý qajettigin atap ótti.
İshki ister mınıstri jarıalaǵan profılaktıka jyly aıasynda Áýezov aýdanynda oıyn-saýyq mekemelerindegi qaýipsizdik máselesi boıynsha arnaıy jıyn ótti. Jıynǵa aýdandyq polısıa basqarmasynyń, tótenshe jaǵdaılar departamenti men sanıtarlyq-epıdemıologıalyq qyzmet mamandary, sondaı-aq bar, meıramhana jáne túngi klýb ıeleri qatysty.
Áýezov aýdandyq polısıa basqarmasynyń bastyǵy Danıar Meńdebaevtyń aıtýynsha, aýdandaǵy 65 oıyn-saýyq mekemesiniń 16-synda buzaqylyq pen tóbeles jıi tirkeledi. Ótken jyly osy oryndarda 61 qylmys jasalǵan.
Meńdebaev atap ótkendeı, kóptegen oıyn-saýyq oryndary kúzet uıymdarynyń qyzmetine tıisti lısenzıasy joq, al kúzetshiler janjaldardy toqtatýdyń ornyna, kelýshilerdi ǵımarattan shyǵaryp jiberýmen ǵana shekteledi. Bul jaǵdaı qylmystyń kóbeıýine ákep soǵady.
Komısıa otyrysynyń qorytyndysy boıynsha, oıyn-saýyq oryndarynda qylmystyń aldyn alý sharalaryn kúsheıtý týraly sheshim qabyldandy. Sonymen qatar, esirtki saýdasynyń aldyn alý jumystary basty nazarǵa alynyp, mekeme ıelerine naqty mindetter júkteldi.
Oıyn-saýyq mekemeleriniń ıelerine:
- Lısenzıasy bar kásibı kúzet qyzmetin qoldaný;
- Beınebaqylaý kameralaryn ornatý jáne olardyń sanyn arttyrý;
- Qaqtyǵys jaǵdaılaryn azaıtý úshin qosymsha qaýipsizdik sharalaryn qarastyrý mindetteldi.
Almaty qalasynyń quqyq qorǵaý organdary qaýipsizdik erejelerin buzǵan oıyn-saýyq oryndaryna qatań sharalar qoldanatynyn eskertti.