«Otbasynyń sıfrlyq kartasyna» 19 mln qazaqstandyqtyń derekteri engizildi. Bul týraly Óńirlik komýnıkasıalar qyzmetinde Astana qalasy boıynsha Eńbek jáne áleýmettik qorǵaý komıteti departamentiniń basshysy Qanat Toqtybaev aıtty, dep habarlaıdy QazAqparat tilshisi.
«Memleket basshysynyń tapsyrmasy boıynsha 2022 jyldyń 1 qyrkúıeginen bastap pılottyq rejımde «Otbasynyń sıfrlyq kartasyn» engizý bastaldy. Shyn máninde, karta – bul azamattardyń áleýmettik mártebesine baılanysty kepildendirilgen memlekettik qoldaýdyń qandaı da bir túrin alý jónindegi quqyqtary týraly kúndelikti elektrondyq habarlama. Bul - memlekettik qyzmetti jetildirýdiń taǵy bir tetigi. Iaǵnı, memleket aqparattyq júıe arqyly azamatqa memlekettik qoldaý túrlerin onlaın alý múmkindigin usynady», - dedi Qanat Toqtybaev.
Onyń aıtýynsha, bastapqy kezeńde memlekettik organdardyń aqparattyq júıeleriniń derekteri negizinde otbasylardyń ál-aýqatyn jáne olarǵa kórsetiletin qoldaý sharalaryn anyqtaý boıynsha jumys júrgizildi. Búgingi tańda sıfrlyq kartaǵa shamamen 6 mln otbasynyń, olardyń januıa múshelerimen qosqanda 19 mln adamnyń málimetter engizilgen. Derekter otbasy men onyń músheleriniń mártebesi ózgergen saıyn jańaryp otyrady. Memlekettik qoldaý sharalaryn alýǵa ruqsat berilgen kezde oǵan SMS-habarlama jiberiledi. Keıin áleýmettik járdemaqy, tólemder nemese memlekettik qoldaýdyń ózge de túrlerin taǵaıyndaý júzege asyrylady. Tıisinshe, ol qarajat azamattyń bank shotyna aýdarylady.