Almatylyq Maıra Aldamjarova kosmetologıalyq em-sharadan keıin bet terisi bórtip, densaýlyǵy nasharlap ketkenin aıtady.
Qazir ol búrkenip júrýge májbúr. Aıtýynsha, quqyq qorǵaý organdary ázirge eshqandaı shara qoldanbaı otyr. Arnamyzǵa sońǵy kúnderi plasıkalyq hırýrgıa, dermatokosmetologıa mamandaryna zardap shekken birneshe qyz-kelinshek habarlasty, dep habarlaıdy Almaty-akshamy.kz Qazaqstan.tv saıtyna silteme jasap.
Maıra ózin mundaı jaǵdaıǵa jetkizgen kosmetologty áleýmettik jeli arqyly tapqan. Betin árletpek bolyp, onyń kómegine júgingen. Prosedýralaryn qabyldaǵan soń beti bórtip ketipti.
«Men habarlasqan kezde kishkene ýaqyttan keıin ketedi dedi. Olaı bolmady. Qańtar aıynyń 4-5-ne qaraı betim qyzaryp, isik paıda bola bastady. Kosmetolog preparattyń qoldaný merzimi ótip ketken shyǵar, bir jyldan beri salyp júrmin, eshkimmen mundaı bolmaǵan dedi», - deıdi qala turǵyny Maıra Aldamjarova.
Maıranyń aıtýynsha, kosmetolog onyń betine «Gıalýron» dep atalatyn preparat ekken. Kosmetologty izdep, klınıkasyna bardyq. Biraq, jumys ornynda bolmaı shaqty.
Sharasyz kúıde qalǵan Maıra qańtar aıynda Bostandyq aýdanyna qarasty PB-ǵa aryz jazyp, medısınalyq saraptamadan da ótken. Alaıda bir aptada daıyn bolýy tıis qorytyndy qaǵaz áli qolyna tımepti. Al polısıadaǵylardyń ýáji mynadaı:
«Bostandyq PB málimetinshe, azamatsha Maıra Aldamjaraovanyń sot-medısınalyq saraptamasy taǵaıyndalyp, onyń nátıjesi daıyn boldy. Sottyń qorytyndysy azamattyń qolyna tapsyrylyp, osy qorytyndysyn negizge ala otyryp, azamattyq, quqyqtyq turǵydan azamatsha Aldamjarova sotqa júginýine bolady», - deıdi qalalyq PD resmı ókili Saltanat Ázirbek.
Jambyl oblysynyń turǵyny Qamajaı Berikova da qabaǵyn tarttyryp, kóziniń aınalasyndaǵy ájimin ketirý úshin operasıa jasatqan. Saldarynan beti men jaǵy qısaıyp, kóziniń aınalasynda tyrtyq qalǵan.
«Meni grımsiz-aq qorqynyshty fılmderge túsire berýge bolatyn edi sol kezde. Qazir mynaý jóndelgen túri. Sonyń ózinde mende qazir «komleks», eldiń betine tike qaraı almaımyn. Tipti, meniń mımıkalarym durys emes. Kúleıin desem, kózdiń jan-jaǵy durys jınalmaıdy», - deıdi Jambyl oblysynyń turǵyny Qamajaı Berikova,
Densaýlyq saqtaý mınıstrligi sharasyz. Olar plasıkalyq hırýrgıa, kosmetologıa qyzmetine júginerde mynalardy eskergen jón deıdi.
«Plasıkalyq hırýrgıa, dermatokosmetologıa medısınalyq qyzmettiń lısenzıalanatyn kishi túri bolyp tabylady. Eger siz plasıkalyq hırýrgıa, dermatokosmetologıa qyzmetine júginetin bolsańyz, birinshi kezekte ol uıymnyń lısenzıasy bar ma, joq pa, sony talap etińiz. Ekinshiden, sizge qyzmet kórsetetin mamannyń sertıfıkaty bar ma, joq pa, sony suraý kerek», - deıdi QR DSM Medısınalyq jáne farmasevtıkalyq baqylaý komıtetiniń basqarma basshysy Baǵjan Muhambetbek.
Zańgerler bolsa, mundaı jaǵdaıǵa tap bolǵandardy qorǵaıtyn arnaıy zań bar ekenin aıtty.
«Bul jerde QK 317-baby bar, bul bap boıynsha ákimshilik jazaǵa tartýy múmkin. Bolmasa, densaýlyǵyna zıan keletin bolsa, 3 jylǵa deıin bas bostandyǵynan aıyrylýy múmkin. Eger adam ólimine keletin bolsa, 5 jylǵa deıin bas bostandyǵynan aıyrylýy múmkin. Bul kezde zardap shekken adam dálel jınaý kerek», - deıdi zańger Marǵulan Shynybaev.
Betindegi bórtpemen alysqan Maıra endi sotqa júginip, shyǵyndaryn óteýdi talap etpek. Ol qyz-kelinshekterdi ózi sekildi ajarlanamyn dep opyq jep qalmasa eken deıdi.