Otbasynyń sıfrlyq kartasyn engizýdiń nátıjesinde myńdaǵan qazaqstandyqtar áleýmettik-eńbek salasy boıynsha ózderine kórsetilýi tıis memlekettik qyzmetterdi esh qıyndyqsyz 1414-ten kelgen SMS-habarlamaǵa jaýap berý arqyly proaktıvti túrde aldy, dep habarlaıdy Almaty-akshamy.kz.
Eńbek jáne halyqty áleýmettik qorǵaý mınıstrliginiń málimetinshe, bul qyzmetti OSK jáne memlekettik qyzmet kórsetýdiń proaktıvti formatynyń artyqshylyqtaryn balaly bolǵan áıelder oń baǵalaýda.
«Men kópbalaly otbasylarǵa beriletin járdemaqy alýǵa quqyly ekenimdi biletinmin, biraq ol úshin arnaıy ınstansıalarǵa baryp ótinish jazyp, qaǵazdar jınaý kerek dep oıladym. Oǵan qaı kúni baratynymdy josparlap ta qoıǵan bolatynmyn. Biraq josparym aıaq astynan ózgerip shyǵa keldi, sebebi bosanǵannan keıin birneshe kún ótken soń uıaly telefonyma SMS-habarlama keldi. Men oǵan jaı ǵana jaýap berý arqyly járdemaqy alýshy boldym. Bul óte yńǵaıly eken», – dep bólisti Qostanaı oblysyndaǵy Qamysty kentiniń turǵyny Gúlnár Aldońǵarova.
«Jalpy, men járdemaqy taǵaıyndalǵanǵa deıin osyndaı fýnksıa bar ekenin bilmedim. SMS-habarlama kelgende maǵan eshqaıda barýdyń qajeti joq ekenine qýandym. Meniń jaýabymnan keıin járdemaqy taǵaıyndalyp, shotyma aqsha bir aıdan keıin tústi», – dedi Taraz qalasynyń turǵyny Nazgúl Shyrynbek.
Otbasynyń sıfrlyq kartasy memlekettik organdardyń barlyq qoldanystaǵy aqparattyq júıeleriniń derekteri negizinde qalyptastyrylady. Búgingi kúni onda Qazaqstannyń 19,8 mln-nan astam azamaty nemese 6 mln-nan astam otbasy týraly aqparat jınaqtalǵan.
Azamatqa qoldaý sharasy qajet qandaı da bir ómirlik jaǵdaı týyndaǵan ýaqytta, ol mobıldi azamattar bazasynda kórsetilgen nómirine SMS-habarlama alady jáne qyzmet alý ýaqytyn edáýir qysqarta otyryp, oǵan birden jaýap berýine bolady. Ótinimdi resimdeý úshin HQKO nemese basqa mekemege júginýdiń qajeti joq.
Jyl basynan beri 740 myńnan astam osyndaı habarlama jiberildi. Olarǵa 283 myńnan astam adam jaýap berdi jáne eshqandaı ótinishsiz óz tólemderin nemese járdemaqylaryn aldy.
Aıta ketý kerek, belgili bir memlekettik kórsetiletin qyzmetti proaktıvti alýǵa múmkindik beretin SMS-ten basqa, OSK-da zeınetaqy jasyna jetkenge deıin 2 aı buryn zeınetaqy tólemderin alý múmkindigi týraly, berilgen/uzartylǵan «qandas» mártebesiniń aıaqtalý merzimi týraly avtomatty habarlamalar, sondaı-aq jumyssyzdar úshin jumys izdeý, tegin oqýdan ótý múmkindikteri jáne jumyspen qamtý salasyndaǵy memlekettik qoldaýdyń basqa da sharalary týraly habardar etý tetigi iske qosyldy.
Alaıaqtyq táýekelin boldyrmaý maqsatynda 1414 biryńǵaı baılanys ortalyǵynan kelip túsken SMS-ke jaýap berý qajettigin atap ótemiz.
Barlyq suraqtar boıynsha 1414 nómiri boıynsha baılanys ortalyǵyna habarlasýyńyzǵa bolady. Qońyraý shalý tegin.