Qyrkúıektiń ekinshi jeksenbisinde elimizde Otbasy kúni atap ótiledi. Bul - elimizdegi eń qasterli qundylyqtardyń biri sanalatyn otbasyn ulyqtaıtyn, ata-ana men bala arasyndaǵy baılanysty nyǵaıtatyn erekshe mereke.
Otbasy — árbir adamnyń alǵashqy tiregi, tárbıeniń bastaýy. Halqymyz "Uıada ne kórseń, ushqanda sony ilersiń" dep beker aıtpaǵan. Tulǵanyń qalyptasýy eń aldymen onyń otbasyndaǵy tálim-tárbıesine baılanysty. Áke - asqar taý, ana - meıirim bulaǵy, al bala - otbasynyń baqyty men bolashaǵy.
Prezıdentimizdiń otbasyn qoldaý baǵytyndaǵy bastamasy – el bolashaǵy úshin mańyzdy strategıalyq qadamdardyń biri. Memleket basshysy Qasym-Jomart Toqaev joldaýlarynda jáne áleýmettik saıasatta otbasy ınstıtýtyn nyǵaıtý, balalardy qorǵaý, áıelder men jastardy qoldaý máselelerine erekshe nazar aýdaryp keledi.
Prezıdenttiń bul baǵyttaǵy saıasaty naqty istermen dáleldenip otyr. Sonyń jarqyn mysaly – Almaty qalasynda Jumyspen qamtý jáne áleýmettik baǵdarlamalar basqarmasynyń "Erte aralasýdyń áleýmettik qyzmetter ortalyǵynyń" ashylýy. Bul – memleket tarapynan kórsetilip otyrǵan tereń áleýmettik qamqorlyqtyń kórinisi. Erte aralasý arqyly balalardyń áleýeti erte kezeńde anyqtalyp, olardyń qoǵamǵa tolyqqandy beıimdelýine múmkindik týady. Osyndaı bastamalar otbasy ınstıtýtyn nyǵaıtyp qana qoımaı, el bolashaǵy – jas urpaqtyń sapaly damýyna negiz qalaıdy.
Erte aralasý – bul damýynda buzylystary bar nemese olardyń týyndaý qaýpi bar erte jastaǵy balalarǵa (0 jastan 3 jasqa deıin) jáne olardyń otbasylaryna qoldaý kórsetýge baǵyttalǵan is-sharalar men qyzmetterdiń kesheni. Erte aralasýdyń negizgi maqsaty – buzylystardyń saldaryn barynsha azaıtý, balanyń áleýetin tolyq damytý jáne ony qoǵamǵa beıimdeýge ońtaıly jaǵdaı jasaý.
— Erte aralasýdyń áleýmettik qyzmetter ortalyǵynyń basty ereksheligi - tek balalarmen jumys istemeıdi, qarapaıym kúndelikti ómirlik jaǵdaılarda otbasy múshelerimen birlese otyryp qarym-qatynas ornatamyz. Erte aralasýdyń negizgi qaǵıdasy - otbasyn qoldaý, ata-analardy kómek kórsetý prosesine belsendi tartý, balanyń damýyna jaǵdaı jasaýǵa járdemdesý.
Tárbıeli urpaq — eldiń erteńi. Al el erteńin senip tapsyratyn urpaqtyń boıyna izgilik, adamgershilik pen ulttyq qundylyqtardy sińirýde otbasylyq tárbıeniń róli zor, — deıdi Jumyspen qamtý jáne áleýmettik baǵdarlamalar basqarmasynyń "Erte aralasýdyń áleýmettik qyzmetter" ortalyǵynyń ádisker mamany Z.Jaılaýova.