Bul týraly Óńirlik komýnıkasıalar qyzmetiniń alańynda Almaty qalasy «Otbasy bank» AQ dırektory Danagúl Túsipova aıtty.
Nesıeleý mehanızmi qazaqstandyqtarǵa Almatyda jyldyq 7% (JTSM 7,4%-dan) mólsherlememen nesıege páter satyp alýǵa múmkindik beredi. Zaem 25 jylǵa deıin beriledi. Eń joǵarǵy somasy 100 mln teńgege deıin, dep habarlaıdy Almaty-akshamy.kz.
Ádette, komersıalyq naryqtan úı satyp alǵanda, "Otbasy bank" 50% bastapqy jarnamen nesıe beredi. Qurylys salýshylarmen jasalǵan kelisimderdiń arqasynda bastapqy jarna somasyn 30 paıyzǵa deıin tómendetýge bolady.
Almatyda osy ádis boıynsha "Otbasy bank" klıentterine qalanyń 10 turǵyn úı keshenindegi 850 páter usynylǵan. Turǵyndarymyz ózderine unaıtyn nysandy tańdap, Baspana Market portalynda nemese bank bólimshesinde páter brondatyp, nesıege ótinish bere alady.
«Jyl basynan beri "Otbasy bank" qyzmetkerleri 8400 zaem berdi. Demek, kúnine 150-160 adam qoljetimdi nesıege ótinish berip, qonys toıyn toılaıdy. Berilgen nesıeniń tórtten biri Almatynyń úlesine tıesili. Sonymen qatar, qala turǵyndary jınaqtaý jáne odan ári turǵyn úı satyp alý úshin kún saıyn 100-den astam jańa depozıt ashady. Olardyń barlyǵy memlekettik baǵdarlamalardyń sharttaryna sáıkes kelmeıdi. Bizdiń ınvestorlarymyzdyń kópshiligi turǵyn úıdi komersıalyq naryqtan satyp alady. Ásirese, olar úshin biz ázirleýshilermen birge jańa ónimderdi ázirleýdemiz, onyń basty qundylyǵy bastapqy jarnany 50%-dan 30%-ǵa deıin tómendetý bolyp tabylady. Qurylys kompanıalarynan bólingen sýbsıdıalar ony azaıtýǵa múmkindik berip otyr», – dep túsindirdi «Otbasy bank» Almaty qalasy boıynsha fılıalynyń dırektory Danagúl Túsipova.
Sondaı-aq, "Otbasy bank" qazaqstandyq kásiporyndarmen birge taǵy bir ónim – «Korporatıvti» baǵdarlamasyn iske asyrýda. Onyń aıasynda kompanıa óz qyzmetkerleriniń baspana máselesin sheshýge kómektesedi. Búgingi kúni "Otbasy bank" Almaty qalasyndaǵy «Qazinterservice» JSHS-men kelisimshartqa otyrdy. Onyń aıasynda kásiporyn 250 mln teńge bólip otyr. Qarajat "Otbasy bankine" nesıe berý kezinde qyzmetkerlerdiń alǵashqy jarnasynyń bir bóligin jabýǵa jumsalady
«Osy yntymaqtastyq aıasynda nesıe mólsherlemesi 7%-dan 8,5%-ǵa deıin (JTSM 7,4%-dan) bolady. Bul rette kompanıa óz qyzmetkeri úshin bastapqy jarnanyń bir bóligin jınaqtaýǵa kómektesedi. Ol 20% nemese tipti 30% bolýy múmkin. Kompanıanyń mundaı qoldaýy jeke baspanaǵa aparar joldy aıtarlyqtaı qysqartady, ıaǵnı jaqyn arada qonys toıyn toılaýǵa kómektesedi. Bul Otbasy bankiniń «Korporatıvtik» ónimi kásiporyndarǵa óz qyzmetkerleriniń baspana máselesin jyldam sheshýge múmkindik beredi. Al bul áleýmettik paketti nyǵaıtyp, qundy kadrlardy ustap qalýdyń bir joly. Búgingi kúni «Korporatıvtik» ónimniń kómegimen Qazaqstan boıynsha 1000-ǵa jýyq adam baspana satyp alýǵa múmkindik aldy. Bıyl kezekti qonys toıyn kútip otyrmyz», – dedi Danagúl Túsipova.
«Baqytty otbasy» memlekettik baǵdarlamasy aıasynda bıyl Almatyda 905 páter satylady. Qatysýshylar tizimi otbasybank.kz platformasynda 2022 jyldyń 20 maýsymy men 19 shildesi aralyǵynda ótkizilgen konkýrs nátıjeleri boıynsha qalyptastyryldy. Bul kóp balaly jáne tolyq emes otbasylar, sondaı-aq múmkindigi shekteýli balalardy tárbıelep otyrǵan otbasylar. Olarǵa arnalǵan baspanany qalalyq ákimdik «Jas qanat» shaǵyn aýdanynan salyp berdi. Nesıe alý prosesi júrip jatyr. Olar jylyna 2% mólsherlememen (JTSM 2,1%-dan bastap) beriledi. Memlekettik baǵdarlamanyń sharttary boıynsha bastapqy tólem nesıe somasynyń keminde 10 paıyzyn quraıdy.
Sondaı-aq bıyl Almatyda «Almaty jastary» baǵdarlamasyn júzege asyrý jalǵasady. Ol 1100-ge jýyq jas azamatty qamtıtyn bolady. Bul baǵdarlama boıynsha ótinimderdi qabyldaýdyń bastalǵany týraly qala ákimdigi men Otbasy bank qosymsha habarlaıtyn bolady.