Almaty №4 qalalyq klınıkalyq aýrýhanasynda robot kómegimen tize jáne jambas býyndaryn aýystyrý boıynsha otalar jasalatyn bolady
Almaty №4 qalalyq klınıkalyq aýrýhanasy (№4 QKA) robottyń qatysýymen Qazaqstanda alǵashqy ortopedıalyq operasıalardyń jasalatyny týraly habarlaıdy. 2023 jyldyń 7 qarashasy Qazaqstannyń medısınalyq tájirıbesinde aıtýly kún.
Ortopedıa salasynyń tanymal mamany Mırambek Jumaǵulovtyń jetekshiligimen jáne Prıorov atyndaǵy Ǵylymı-medısınalyq zertteý ortalyǵy (Máskeý) mamany Alekseı Shýmskııdiń qatysýymen, jalpy tize men jambas býyndaryn endoprotezdeý, sondaı-aq tize býynyn bir aıdarshyqty protezdeýdi qamtıtyn alǵashqy operasıalar jasaldy.
Robotty paıdalanǵan kezde emdeý ár naýqasqa jeke tásil prınsıpi boıynsha júrgiziledi, robot operasıaǵa deıin ımplanttyń ońtaıly ólshemin jáne ony ornatýdyń naqty ornyn tańdaı otyryp, jasandy býynnyń dál 3D josparlaýyn oryndaıdy.
«Qarashanyń 3-i men 7-si aralyǵynda biz Qazaqstanda robottyń kómegimen tize jáne jambas býyndaryn aýystyrý boıynsha alǵashqy operasıalardy jasadyq. Biz endoprotezdeýge muqtaj 9 naýqasty tańdadyq. Úmitkerlerdi muqıat irikteý birneshe aı boıy júrgizildi. Dárigerler konsılıýmy ótip, jasandy býyndy dál 3D josparlaý úshin KT zertteýdiń sıfrlyq nátıjeleri AQSH mamandaryna jiberildi. Robotty qoldanýdyń arqasynda operasıa dál josparlanǵandaı - 1 mm-den az qatelikpen júzege asyrylady. Sondaı-aq jumsaq tinderdiń jaqsyraq saqtalýy qamtamasyz etilip, baılam apparatynyń ońtaıly tepe-teńdigine qol jetkiziledi», - deıdi Almaty №4 QKA hırýrgıa bólimshesiniń meńgerýshisi Mırambek Jumaǵulov.
Stryker kompanıasy usynǵan Mako tehnologıasy dálirek jáne boljamdy hırýrgıalyq nátıje beredi, qalpyna keltirý ýaqytyn qysqartady jáne protezdiń uzaq merzimin qamtamasyz etedi. Mako tehnologıasyn qoldana otyryp, bir aıdarshyqty endoprotezdeý jasatqan naýqastar onyń jaraqaty az ekenin, belsendi ómir saltyna tez oralý múmkindigin jáne «qalypty» býyn sezimine jaqyndaý múmkindigin atap ótedi.
«Bul tehnologıa damyǵan elderde tanymal, ony AQSH, Kanada, Japonıa, Koreıanyń jetekshi klınıkalarynda qoldanyp keledi. Almaty qalasy ákimdiginiń qoldaýymen biz búgin Qazaqstanda robottyń kómegimen tize jáne jambas býyndaryn aýystyrý alǵashqy otalaryn jasadyq – bul ınovasıalyq ortopedıa úshin ári travmatologıalyq-ortopedıalyq kómekti jetildirýdiń jańa kezeńi. Jyl saıyn mundaı operasıany qajet etetin naýqas sany artyp keledi. Máselen osy jyldyń 10 aıynda bizdiń aýrýhanada bir jarym myńnan astam býyn aýystyrý otasy jasaldy. Bizdiń maqsatymyz – qyzmetimizdi jetildirip, sapaly medısınalyq kómek kórsetý», – deıdi Almaty №4 QKP dırektory, m.ǵ.k., MBA, DBA, profesor Birjan Dosmaılov.
Almaty №4 QKA shuǵyl jáne josparly negizde mamandandyrylǵan, joǵary tehnologıalyq medısınalyq kómek kórsetetin kópbeıindi klınıka. 2012 jyly aýrýhanada jambas, tize, ıyq, shyntaq býyndaryn aýystyrý boıynsha halyqqa kómek kórsetetin, sonymen qatar aıaq-qoldyń iri býyndaryndaǵy endoprotezdi tolyq jáne jartylaı aýystyrýdy júzege asyratyn mamandandyrylǵan endoprotezdeý bólimshesi ashyldy. Endoprotezdeý tájirıbesi 1975 jyly Chýchýlo Anatolıı Nıkolaevıchtiń №4 QKA-da jambas býynyn bir polústy endoprotezdeý operasıasyn jasaǵan kezden bastaý alady. Osy jyldar ishinde 20000-nan astam pasıentke býyn aýystyrý operasıasy jasalǵan. Osy jyldyń basynan beri №4 QKA-da 1526 býyn aýystyrý otasy jasaldy. 2022 jyly 1648 endoprotezdeý operasıasy jasalǵan.