Silk Way telearnasynda aǵylshyn tilinde New Time jańalyqtar qyzmeti óz jumysyn bastady.
Aǵylshyn tilindegi jańa aqparattyq-saraptamalyq baǵdarlama álemniń 118 elindegi halyqaralyq aýdıtorıaǵa arnalǵan, dep habarlaıdy Almaty-akshamy.kz QazAqparatqa silteme jasap.
«New Time baǵdarlamasynyń kontenti sheteldik kórermenderdiń Ortalyq Azıada bolyp jatqan oqıǵalarǵa degen qyzyǵýshylyǵynyń artýyna baılanysty jasaqtaldy. Qazir qarqyndy damyp kele jatqan bul óńirge álemdik aýdıtorıanyń nazary aýyp otyr. Silk Way arnasyndaǵy New Time efırinde biz kópshilik kórermenge Qazaqstan men Ortalyq Azıadaǵy ózekti saıası, ekonomıkalyq, mádenı jáne sport jańalyqtaryn usynamyz. Budan basqa qazaqstandyq jáne halyqaralyq sarapshylardyń arnaıy sholýyn ázirleımiz», — dedi Prezıdent TRK basqarýshy dırektory Erkejan Kúntýǵan.
New Time — Jibek Joly telearnasynan kórsetiletin «Jańa Ýaqyt» jáne «Novoe Vremá» aqparattyq-saraptamalyq baǵdarlamalarynyń aǵylshyn tilindegi nusqasy.
Jańalyqtardyń júrgizýshisi — Aınur Imanǵalı álemge áıgili «BBC Scotland», «Djordjıa ýnıversıteti» jáne Deutsche Welle sıaqty medıakompanıalarda tájirıbeden ótken.
Ol sondaı-aq, Prezıdent TRK jetekshi mamandarymen birge Astanadaǵy MNU ýnıversıteti janyndaǵy halyqaralyq jýrnalısıka mektebinde stýdentterge dáris oqıdy.
Silk Way arnasyndaǵy jańa baǵdarlamany kórermender apta saıyn ár juma kúni Astana ýaqytymen túngi saǵata 00:00 kóre alady. Al Qazaqstanda baǵdarlama telearnanyń saıty men áleýmettik jelidegi resmı paraqshalarynda tikeleı efırde kórsetiledi.
Silk Way — álemniń 118 eline aǵylshyn tilimen qosa 5 tilde habar taratatyn Qazaqstandaǵy alǵashqy ulttyq spýtnıktik telearna. Ol QR Prezıdenti Teleradıokesheniniń qurylymyna kiredi.
Arnanyń kontenti 100% otandyq teleónimderden turady.