Almaty turǵyny Dáýren Nyǵmetmyńjanı júk kólikterine arnalǵan aýa súzgilerin jasaý úshin 20 mln. teńge kóleminde jeńildetilgen nesıe aldy. Qarajat «Almaty Business–2025» memlekettik baǵdarlamasy aıasynda bólingen.
– Men úsh jylǵa jyldyq 6%-ben nesıe aldym, soǵan oraı 6 aıǵa «salyqtyq demalys» berýdi ótindim. Bul óz kásibimdi ashamyn degen táýekelshil jandarǵa memleket tarapynan kórsetilip otyrǵan óte úlken qoldaý dep sanaımyn. Oıyńa alǵan isti júzege asyrý bastapqy kezeńde kim-kimge de ońaıǵa tımeıdi. Osy oraıda «Qoldaý» kásipkerlik ortalyǵynyń maǵan bergen tegin kásipkerlik keńesterine, bıznes-jospar ázirleýime kómektesip, jeńildetilgen nesıege qol jetkizgenime deıin birge júrip rıasyz qoldaý kórsetken qyzmetkerlerine alǵysymdy bildiremin, – deıdi Dáýren Nyǵmetmyńjanı.
Júk kólikterine arnalǵan aýa súzgileri jasalatyn qajetti shıkizat – myryshtalǵan tor men qaǵazǵa arnalǵan metal býmasyn ózimizdiń elden satyp alypty. Búgingi naryqta mundaı shıkizattyń reseılik jáne qytaılyq túrleri bar, biraq olardyń baǵasy asa qymbat. Al otandyq shıkizattardyń sapasy olardan kem emes deıdi Dáýren.
– Bizdiń ónim Almaty, Aqtaý, Taraz, Óskemende úlken suranysqa ıe. Qazir biz qytaılyq «Hovo» júk kólikterine arnalǵan aýa súzgilerin jasap jatyrmyz. Bolashaqta jeńil avtokólikterge arnalǵan súzgilerdi shyǵarýdy josparlap otyrmyz, – deıdi ol.
Ázirge Qazaqstanda onyń qolǵa alǵan salasy boıynsha básekelester joq. Dáýrenniń sehy aıyna 1500 dana ónim óndiredi, 7 adamdy jumyspen qamtyp otyr.