«Ámen aǵanyń ǵajaıyp báıteregi» atty qysqametrajdy múltfılm túsirildi
QR Mádenıet jáne sport mınıstri Dáýren Abaev «Qazaqanımasıa» shyǵarmashylyq birlestiginiń jumysymen tanysty, dep habarlaıdy Almaty-akshamy.kz QazAqparatqa silteme jasap.
Qazaqstandyq anımasıaǵa bıyl 55 jyl toldy. Sháken Aımanov atyndaǵy «Qazaqfılm» kınostýdıasy janynan «Qazaqanımasıa» shyǵarmashylyq birlestigi (SHB) ashylyp, qazaq múltıplıkasıasynyń jumysy qaıta jandandy. Búgingi tańda «Qazaqanımasıa» shyǵarmashylyq birlestigi konkýrstyq negizde respýblıkanyń iri qalalarynan málimdelgen 167 senarı ishinen úzdik 20-syn tańdap, 5 mınýttyq anımasıalyq kartınalardan turatyn 20 pılottyq jobany aıaqtap úlgerdi.
«2022 jyl ulttyq anımasıalyq kıno óneri úshin aıtýly jyl boldy. Sebebi bıyl qazaq anımasıalyq kıno ónerine 55 jyl toldy. Anımasıa salasy maıtalmandarynyń talaı jyldan bergi armany oryndalyp, Sháken atamyzdyń atyndaǵy «Qazaqfılm» kınonostýdıasy janynan «Qazaqanımasıa» shyǵarmashylyq birlestigi jańadan jasaqtalyp, qaıta quryldy. 1967 jyly qazaq múltıplıkasıasynyń negizin qalaýshy, rejıser Ámen Qaıdardyń «Qarlyǵashtyń quıryǵy nege aıyr?» atty tuńǵysh fılminen bastaý alǵan Qazaq anımasıalyq kıno óneri elimizdiń keleshegi jas urpaqqa jarty ǵasyrdan astam ýaqyt boıy tolassyz qyzmet etýmen keledi», - dedi QR Mádenıet jáne sport mınıstri Dáýren Abaev.
«Qazaqanımasıa» shyǵarmashylyq birlestiginiń jumysy bastalǵaly úsh aı ishinde anımasıa salasyndaǵy álemniń jetekshi mamandarynan sheberlik synyptary ótkizildi. Oqý baǵdarlamasy barysynda 300-den asa stýdentter men joba qatysýshylary sheteldik jáne qazaqstandyq mamandardyń dáristeri men praktıkalyq sabaqtaryna qatysyp, kásibı tájirıbelerin shyndady.
İs-shara barysynda Mádenıet mınıstri anımasıa ardagerlerine marapatady. «Eńbek ardageri» medalin, kınorejıser-mýltıplıkatorlar Gúlmıra Sadyqova men Galına Dýsenko jáne sýretshi-mýltıplıkator Ernst Beıseıtov aldy.
Mádenıet mınıstrine «Qazaqanımasıa» SHB sheńberinde qurylǵan 20 pılottyq joba kórsetildi. Sonymen qatar, qazaqstandyq mýltıplıkatorlar anımasıa salasyndaǵy halyqaralyq áriptesterimen memorandýmdarǵa qol qoıyldy.
Aıta keteıik, 55 jyl ishinde otandyq eki júzden asa múltfılm túsirilip, otyzdan asa anımasıalyq stýdıalar ómirge keldi. 2018 jyly anımasıalyq kınostýdıalar qaýymdastyǵy qurylyp, óz kezeginde bul qaýymdastyq rýhanı-mádenı mańyzy bar kóptegen is sharalardy atqaryp keledi. Sonyń ishinde jyl saıyn uıymdastyrylatyn Halyqaralyq Amen festıvali.
Bıyl Amen festıvaline qatysýǵa Ázerbaıjan, Grýzıa, Ispanıa, Qazaqstan, Qytaı, Túrkıa, Ózbekstan jáne Fransıa mýltıplıkatorlarynan barlyǵy 147 ótinim tústi, olardyń 55-i irikteýden ótti. Bul jobalardy otandyq jáne sheteldik anımasıanyń kórnekti qaıratkerleri engen qazylar alqasy iriktedi.
Aldaǵy jyly qazaq anımasıalyq kıno óneriniń atasy Ámen Qaıdardyń týǵanyna bir ǵasyr, ıaǵnı 100 jyl tolmaq. Osyǵan oraı «Qazaqanımasıa» shyǵarmashylyq birlestiginde Ulttyq kınony qoldaý memlekettik ortalyǵynyń tapsyrysymen «Ámen aǵanyń ǵajaıyp báıteregi» atty qysqametrajdy múltfılm túsirildi.