Endi Parlament músheleri ortalyqtan bastap naqty aýdan, qala, aýylǵa deıingi bólingen búdjet qarjysyn tolyq baqylaı alady
Prezıdentke Parlament Májilisiniń spıkeri palatanyń VII shaqyrylymynyń úshinshi sesıasy aıasynda atqaryp jatqan zań shyǵarý jumystary týraly baıandady, dep habarlaıdy Almaty-akshamy.kz Aqordanyń baspasóz qyzmetine silteme jasap.
Qazirgi kezde azamattardyń tólem qabiletin qalpyna keltirý jáne olardyń bankrottyǵy, qoǵamdyq baqylaý, turǵyn úı saıasatyn reformalaý týraly, sondaı-aq densaýlyq saqtaý salasyna jáne qoǵamdaǵy basqa da ózekti máselelerge qatysty zań jobalary depýtattardyń qaraýynda jatyr.
Erlan Qoshanov Qasym-Jomart Toqaevqa Májilis pen qaıta qurylǵan Joǵary aýdıtorlyq palata arasyndaǵy ózara is-áreket mehanızmderi týraly málimet berdi. Endi Parlament músheleri ortalyqtan bastap naqty aýdan, qala, aýylǵa deıingi bólingen búdjet qarjysyn tolyq baqylaı alady. Bul barlyq qarajattyń maqsatty jumsalýy men tıimdiligin saraptaýǵa múmkindik beredi.
Sondaı-aq spıker Májilis janynan qurylǵan Qoǵamdyq palatanyń jumysy týraly aıtty. Onyń quramyna depýtattar, sarapshylar, saıası partıalardyń, úkimettik emes uıymdardyń ókilderi kirdi. Qoǵamdyq palatada ázirlenip jatqan zań jobalaryn qoǵamnyń suranysy men talap-tilegi turǵysynan turaqty túrde talqylaý josparlanyp otyr.
Memleket basshysyna Parlamenttiń tómengi palatasy janyndaǵy Qoǵamdyq qabyldaýdyń jumysy týraly esep berilip, Májilistiń qoǵamǵa ashyqtyǵyn arttyrý jónindegi jobalary tanystyryldy.