Barlyq kóppáterli turǵyn úıler jylýmen qamtamasyz etilgen
Pavlodar oblysynyń Ekibastuz qalasynda 28 qarshada engizilgen tótenshe jaǵdaı rejımi alyndy, dep habarlaıdy Almaty-akshamy.kz qala ákimdigine silteme jasap.
Ekibastuz ákimdiginiń habarlaýynsha, 2022 jylǵy 8 jeltoqsanda Ekibastuz qalasynyń ákimi jergilikti aýqymdaǵy tehnogendik sıpattaǵy TJ rejıminiń kúshin joıý týraly sheshim qabyldady.
Buǵan deıin TJ rejımi Ekibastuz qalasy ákiminiń aǵymdaǵy jylǵy 28 qarashadaǵy №3 sheshimi negizinde engizilgen bolatyn.
TJ joıý úshin jergilikti atqarýshy organnyń ákimshilik resýrsy ǵana emes, azamattar, kásipkerlik sýbektileri, kásiporyndar men eriktiler de tartyldy.
Barlyq kóppáterli turǵyn úıler jylýmen qamtamasyz etilgen.
Sonymen qatar, kóppáterli jáne jeke jer úılerde gıdravlıkalyq rejımdi qalpyna keltirý boıynsha retteý jumystary jalǵasatyn bolady. Sátbaev, 8 jáne Máshhúr Júsip 52 kóshelerindegi úılerdiń 7 korpýsynda sý men kárizdi qalpyna keltirý jumystary júrgizilýde.
Jeke sektordyń jylýmen jabdyqtaý júıelerin qalpyna keltirý jumystary jalǵasýda. Ortalyq jylýmen jabdyqtaýǵa qosylmaǵan taǵy 40 jer úı bar.
8 brıgadanyń kúshimen qalanyń jylý trassalaryndaǵy usaq aqaýlar men zaqymdardy joıý jumystary atqarylýda.
Magıstraldyq jáne oramishilik jelilerdegi temperatýralyq parametrlerdi teńestirý jáne retteý jumystary jalǵasýda.
Turǵyndar jylýmen jabdyqtaý máselelerimen «Ekibastuzteploenergo» JSHS apattyq qyzmetine táýlik boıy júgine alady.
Úı-jaılarda qajetti temperatýralyq rejım belgilengennen keıin mektepter men balabaqshalardyń jumysyn shtattyq rejımde qaıta bastaý josparlanýda.
TJ-dan zalal alǵan azamattardyń ótinishterin qabyldaý jalǵasýda. Ótinishter tirkelgennen keıin odan ári óteý úshin zalaldy aıqyndaı otyryp, turǵyn úıdi komısıalyq tekserý júrgiziledi.
TJ aımaǵynda zardap shekken azamattardyń zalalyn óteý «Ekibastuzteploenergo» JSHS esebinen júrgiziledi.
Jylýsyz qalǵan úıler qarasha jáne jeltoqsan aılaryna jylýmen jabdyqtaý qyzmetteri úshin aqy tóleýden bosatylady, qalǵan jaǵdaılarda – qaıta esepteý júrgiziledi.
TJ rejımi kezinde tutynylǵan elektr energıasynyń qyzmetterin qaıta esepteý máseleleri qarastyrylýda. Sheshim qabyldanǵan soń, qorytyndysy boıynsha aqparat qosymsha jetkiziletin bolady.
Eske salaıyq, 27 qarashada Ekibastuz jylý elektr ortalyǵynda apat bolyp, qala turǵyndary jylýsyz qaldy.