Qazaq kınosynda ilgerileý bar
«Qazaqfılm» kınostýdıasynyń málimetinshe, «Barymtashylar. Ýaqyt joldary» fılmi Fransıada prokatqa shyǵýda, dep habarlaıdy Almaty-akshamy.kz.
Otandyq rejıser Erlan Nurmuhambetovtiń japondyq áriptesi Lıza Takebamen birlesip túsirgen «Barymtashylar. Ýaqyt joldary» fılmi Fransıada prokatqa shyqty. Kınotýyndynyń prodúseri Iýlıa Kımniń aıtýynsha, Qazaqstan men Japonıa birlesip túsirgen kartına búginnen bastap Fransıanyń 21 qalasynda kórsetiledi. Aıta ketsek, osyǵan baılanysty búgin Parıjdegi Espace Saint Michel kınoteatrynda sanıtarlyq talaptarǵa sáıkes fılmniń arnaıy kórsetilimi ótedi.
«Osy bir jarym jyl ishinde qanshama tógilgen ter, atqarylǵan jumys jatyr. Pandemıaǵa baılanysty Fransıadaǵy tusaýkeser úsh márte keıinge shegerildi. Degenmen, qıyndyqtarǵa qaramastan, úmitimiz úzilmedi. Fılmniń túsirý toby men akterlerimizdi osy qýanyshpen quttyqtaımyn», - dep jazdy prodúser óziniń Facebook-tegi paraqshasynda.
Aıta keterligi, óndirisine «Qazaqfılm» jáne japondyq Tokyo New Cinema kompanıasy atsalysqan fılmde tynysh ómiriniń shyrqyn buzyp, barymtashylar otaǵasyn aıaýsyz óltirgen otbasy týraly baıandalady. Marqumnyń Oljas esimdi 12 jasar balasy barymtashylardyń qolynan mert bolǵan ákesiniń ólimine qaıǵyryp, zulymdyqpen kúresip, otbasylaryna túsken aýyrtpalyqty qaryndastarymen birge keshedi. Qorǵansyz qalǵan Oljastyń otbasyna ǵaıyptan paıda bolǵan bógde bireý qol ushyn sozady.
Atalǵan fılmde basty rólderdi Kann kınofestıvalinde úzdik aktrısa atanǵan Samal Eslámova, tanymal qazaqstandyq akter Dýlyǵa Aqmolda jáne japondyq akter Mıraı Morıama somdaıdy. Ákesin joǵaltqan balanyń rólin Mádı Mınaıdarov esimdi jas akter oınaıdy.
«Japondyqtarmen birge túsirgen fılm álem kınematografynyń otanynda kórsetiletinine qýanyp ta, qobaljyp ta otyrmyn. Meniń shyǵarmashylyǵymda bul alǵash ret bolyp jatqan qýanyshty jaǵdaı», - dep oıymen bólisti fılmniń teń rejıseri Erlan Nurmuhambetov.
Sondaı-aq «Barymtashylar. Ýaqyt joldary» fılmi eń alǵash 2019 jyly Azıadaǵy eń iri kınofestıvalderdiń biri – halyqaralyq Býsan kınofestıvali sheńberinde kórsetilgen bolatyn. Qazaqstan men Japonıa birlesip túsirgen týyndy Ońtústik Koreıanyń eń úlken ekrany – Busan Cinema Center ortalyǵynda atalǵan festıváldi ashqan edi.
Ótken jyly atalǵan fılm Tokıodaǵy halyqaralyq kınofestıval sheńberinde kórsetilip, Japonıada prokatqa shyqqan bolatyn.
Qazaqstanda «Barymtashylar. Ýaqyt joldary» fılmi elimizde santıarlyq-epıdemıalyq ahýal jaqsarǵan jaǵdaıda aǵymdaǵy jyldyń sońyna deıin prokatqa shyǵady dep josparlanyp otyr.