Astana Hub tehnoparki otandyq IT salasynda maman daıarlaýdy jalǵastyryp keledi, dep habarlaıdy Almaty-akshamy.kz QazAqparatqa silteme jasap.
«Astana Hub – Ortalyq Azıadaǵy eń iri halyqaralyq tehnoparkterdiń biri. Onyń qyzmeti IT bıznes úshin ekojúıeni qalyptastyrýǵa, IT talanttardy qoldaýǵa jáne startap jobalardy damytýǵa baǵyttalǵan. Qazir Astana Hub-ta 1 212 IT kompanıa tirkelgen. Olarǵa aqparattyq-oqý, materıaldyq ınfraqurylym, bıznesti damytý baǵdarlamalary, arnaıy salyqtyq jáne vızalyq tártip turǵysynan qoldaý kórsetiledi. Búgingi tańda 7 myńnan as adam bizdiń baǵdarlamalarymyzdan ótti. Astana Hub qatysýshylary IT salasynda 20 myńnan astam jumys ornyn qurdy», - dedi Astana Hub basqarýshy dırektory Alına Ábdirahmanova OKQ-de ótken brıfıńide.
Hab basshysynyń aıtýynsha, jumystyń negizgi baǵyttarynyń biri IT salasyndaǵy qazaqstandyq talanttar pýlyn tolyqtyrýǵa baǵyttalǵan.
«Astana Hub bilim baǵdarlamalarynyń qyzmeti tehnologıalyq kásipkerlikti tanymal etý jáne tehnologıalyq startap qurý úshin qajetti daǵdylardy oqytý. Sıfrlyq damý, ınovasıalar jáne aeroǵarysh ónerkásibi mınıstrliginiń qoldaýymen iske asqan baǵdarlamalardyń, kýrstar men is-sharalardyń negizinde Astana Hub bilim baǵdarlamalary keńsesi IT ekojúıege jańa talanttardy tartý, startapshylar, frılanserler men kásipkerlerdiń qoǵamdastyǵyn damytýǵa qolaıly jaǵdaı jasalǵan», - deıdi ol.