Ǵalym Almaz Sharman «Habar 24» arnasyndaǵy brıfıńte mundaı nanokapsýla vaksınalaý prosesin aıtarlyqtaı jyldamdatatynyn aıtty, dep habarlaıdy almaty-akshamy.kz
Jýyrda Izraıl álemde birinshi bolyp halqyna Covid-19 indetine qarsy peroraldy vaksına salatyn alǵashqy memleket bolmaq. Bul týraly Oramed Pharmaceuticals bas dırektory Nadav Kıdron Jerusalem Post gazetine bergen suhbatynda málimdedi. Osyǵan uqsas nanokapsýlany qazaqstandyq ǵalym Qaısar Tabynovtyń jasap jatqany belgili boldy. Bul týraly Profılaktıkalyq medısına akademıasynyń prezıdenti, amerıkandyq densaýlyq saqtaý qaýymdastyǵynyń múshesi Almaz Sharman aıtty.
«Bul (nanokapsýla ázirleý – red. túsindirmesi) – óte qyzyq baǵyt. Qazir osymen jumys istep jatyr. Ótken ǵasyrdyń 50-jyldary da vaksınany aǵzaǵa ıne arqyly engizgen. Keıin ishinde profesor Chýmakov bar birneshe ǵalym kapsýla túrinde vaksına oılap tapty. Sol sıaqty qazir birneshe jańa ujym osymen jumys istep jatyr. Sondaı-aq, murynǵa arnalǵan tamshy túrindegi vaksına jasalmaq. Munda úlken logıka bar. Óıtkeni, koronavırýs birinshi kezekte murynǵa jınalady», – dedi Almaz Sharman.
Ári qaraı ol bul baǵyttaǵy jumystarǵa otandyq ǵalymdardyń da úles qosyp jatqanyn aıtty.
«Nanokapsýlamen qazir Agrarlyq ýnıversıtette qazaqstandyq ǵalym Qaısar Tabynov jumys istep jatyr. Óte qyzyq baǵyt, ázirge tolyq júzege aspady. Biraq, Izraıl, Avstralıa, AQSH ǵalymdary naqty osy baǵytty qolǵa aldy. Ol jasalǵan boıda ekpe egý prosesi aıtarlyqtaı jyldam bolmaq. Vaksına burynǵysyna qaraǵanda qoljetimdi bolady. Budan ózge ıne, ekpe salar kezde tazalyqty qamtamasyz etý sekildi talaptardan arylamyz. Adam jaı ǵana kapsýlany jutady. Logıstıka jaǵynan yńǵaıly jáne bul qosymsha qorǵanysh qabatynyń paıda bolýyna tikeleı áser etedi», – dedi maman.