Bekire balyqtaryn bakterıadan emdeıtin antıbıotık.
Bıologıa jáne bıotehnologıa máseleleri ǵylymı zertteý ınsıtıtýtynyń mamandary osyndaı jańalyq ashty. Álemdik suranysqa ıe preparat qazir klınıkalyq synaqtan ótkizilip jatyr, dep habarlaıdy Almaty-akshamy.kz 24.kz-ke silteme jasap.
«Hımerlik Indolızın» dep atalatyn preparat balyqtardyń aǵzasyndaǵy qaýipti bakterıalardy joıyp qana qoımaı, olardyń adam aǵzasyna taralýyn shekteıdi eken. Balyqtarda keńinen taralǵan qaýipti bakterıalarmen kúreste tıimdi antıbıotık ýnıversıtet qabyrǵasyndaǵy myna laboratorıada jasalǵan. «Hımerlik Indolızın» preparaty balyqtardyń aǵzasyndaǵy bakterıalar vırýsynyń genomynan jasalǵan.
«Preparatqa bakterıalarda tózimdilik eshqashan paıda bolmaıdy. Ekinshiden ol balyqtyń eti bolsyn nemese janýardyń eti bolsyn, sol arqyly adamnyń aǵzasyna jetpeıdi. Ol óte az ýaqytta jańa patogenderdi, aýrý týǵyzatyn asa qaýipti patogenderdi 1 mınýt, jarty saǵattyń ishinde tolyǵymen óltiredi», - deıdi «Bıologıa jáne bıotehnologıa máseleleri» ǴZI dırektory Amangeldi Bısembaev.
Dúnıejúzilik densaýlyq saqtaý uıymynyń málimetinshe, búginde sý janýalarynda kezdesetin bakterıalar qarapaıym antıbıotıkke tózimdi bolyp alǵan. Nátıjesinde adam aǵzasyna ótip, ártúrli aýrýlardy qozdyryp jatyr. Al jańa preparattyń maqsaty – osynyń aldyn alý.
«Biz qazir bakterıaǵa qarsy ındolızın negizindegi preparattyń tıimdiligin tekserip jatyrmyz. Bul ǵylymı jumys 2019 jyldan beri zerttelip keledi. Osy jańalyq aıasynda men ózimniń PhD dısertasıamdy qorǵaımyn. Ózge memlekettiń ǵalymdary áli mundaı nátıjege jetken joq», - deıdi genetıka mamandyǵynyń doktoranty Serik Bakıev.
Otandyq ǵalymdar adam aǵzasyna ótpeıtin, bakterıaǵa tózimdi Hımerlik Indolızın ónimin oılap tabýmen ǵana shektelmegen. Preparatty jetildirý arqyly tasymaldaý jolyn da taýypty. Ǵalymdar endi osy antıbıotıkti ózge janýarlar men adamdarǵa synaq jasamaq.