Naqtyraq aıtqanda, dárigerler naýqastyń tiline operasıa jasady.
Ulttyq ǵylymı onkologıa ortalyǵynyń mamandary sırek kezdesetin Makroglossıa dep atalatyn dıagnozy bar 62 jastaǵy naýqastyń tilin rezeksıalaý boıynsha biregeı ota jasady, dep habarlaıdy Almaty-akshamy.kz Elorda.info saıtyna silteme jasap.
QR Densaýlyq saqtaý mınıstrliginiń málimetinshe, naýqastyń tiliniń mólsheri shamadan tys úlkeıip ketken: uzyndyǵy 16-18 sm-ge deıin, al eni 10 sm shamasynda bolǵan.
Makroglossıa - tildiń shamadan tys ulǵaıýymen sıpattalatyn sırek kezdesetin patologıa. Bul aýrýǵa shaldyqqan jannyń tili aýzyna syımaıdy, sondyqtan keıbir naýqastar jıi aýzyn ashyp júrýge májbúr bolady. Makroglossıa kóbinese tynys alýdyń, jutyný jáne sóıleýdiń buzylýyna ákeledi, ómir súrý sapasyn edáýir nasharlatady. Mundaı jaǵdaılarda osy patologıany hırýrgıalyq emdeýdiń qajettiligi týady.
Mundaı patologıa sırek kezdesetindikten jáne hırýrgıalyq tájirıbeniń bolmaýyna baılanysty barlyq medısınalyq mekemeler mundaı otany jasaýǵa daıyn emes.
Naýqas uıqy kezinde tynys alýdyń, jutynýdyń jáne sóıleýdiń buzylýynan zardap shekti. Somatıkalyq jaǵdaı birqatar qatar júretin aýrýlardy kúsheıtti.
Aýyr somatıkalyq jaǵdaıdy eskere otyryp, pasıentti kardıologtar, kardıohırýrgtar, nevropatologtar, endokrınologtar 3 aı boıy muqıat zerttep-qarady. Osydan keıin, UǴOO basshylyǵynyń maquldaýymen naýqas emdeýge jatqyzyldy. Hırýrgtar brıgadasy B.D.Shalabaev, D.Serikbaıuly, A.A.Nurjanov otany sátti jasap shyqty.
Eki aıdan astam ýaqyt ótkennen keıin otanyń oń nátıjesi anyqtaldy. Naýqastyń tili ádettegi ólshemge ıe boldy.