Otandyq dárigerler joǵary radıoaktıvti sáýlelermen em jasaýda.
Gamma-pyshaq qurylǵysy arqyly bir jylda 400-den astam naýqas em-dom alyp shyqqan. Qurylǵy mıdaǵy isikti sáýlemen emdeıdi. Iaǵnı bas súıekti ashýdy qajet etpeıdi. Otandyq neırohırýrgter osy arqyly mıdyń óte qıyn qýysynda paıda bolǵan isikti esh qıyndyqsyz alyp tastaı alady, dep habarlaıdy Almaty-akshamy.kz 24.kz-ke silteme jasap.
Pavel Shvedsov bir jyl burynǵy jaǵdaıyn qaıta eske túsirgisi kelmeıdi. Basynyń aýyrǵanyna mán bermeı júrgende, bir kúni talyp qulaǵan. Mıynda isik paıda bolǵanyn estigende, birden neırohırýrgıa ortalyǵynyń mamandaryna júginipti. Oǵan gamma-pyshaqpen em jasalǵan. Qazir qal-ahýaly jaqsaryp, kólikti de ózi júrgizedi.
"Men buryn basym aınalyp, júre almaı qaldym. Gamma-pyshaqpen esh qıyndyqsyz emdelip shyqtym. Em jasalǵan kúni aıaqqa turdym. Alaıda mıdaǵy isik búrshikteri birnesheý bolǵandyqtan, búgin taǵy tekserilýge keldim", - deıdi qala tuǵyny Pavel Shvedsov.
Radıohırýrgıalyq qondyrǵy mı isigimen qatar, tamyrly jáne fýnksıonaldy aýrýlardy emdeı alady. Apparattaǵy gamma sáýlesi dáriger belgilegen isik oshaǵyna baǵyttalady. Al naýqas eshqandaı aýyrsynýdy sezbeıdi.
Hırýrgıalyq ashyq operasıalardy almastyratyn apparatpen búginge deıin 400-den astam adam em alǵan. Ortalyq Azıada tek bizdiń elde ǵana bolǵandyqtan, kórshi elden keletin naýqastar bar. Qazaqstan azamattaryna bul qurylǵymen em-dom tegin jasalady. Neırohırýrgtardyń qoly jetpeıtin, óte kúrdeli jerde ornalasqan isikterdi osy quraldyń kómegimen joıýǵa bolady, – deıdi maman.
"Keıbir naýqastyń mıynda birneshe isik bolýy múmkin. Olardy da bir mezette kóp bolsa, ekige bólip, arasyn 3-6 aıǵa bólip em júrgizýimiz múmkin. Bunyń artyqshylyǵy tek potologıalyq oshaqty sáýlelendiredi. Bas mıy odan tys qalady. Naýqastar kóbinde bizde mundaı apparat baryn bile bermeıdi. Shetelge baratyndar bar", - deıdi neırohırýrg dáriger Nurzat Syǵaı.
Qazaqstan osyndaı joǵary tehnologıalyq jabdyǵy bar TMD aýmaǵyndaǵy úshinshi el. Jalpy, álemde 400-den astam gamma-pyshaq qondyrǵysy bar, olardyń jartysy AQSH pen Japonıada ornalasqan. Sondyqtan otandyq dárigerler aldaǵy ýaqytta gamma-pyshaqtyń qoldanys aıasyn keńeıtip, túrli aýrýlardy emdeýdi josparlap otyr.