Armıa oıyndarynyń kezekti konkýrstyq kúni qazaqstandyqtar úshin sátti aıaqtaldy.
Qorǵanys mınıstrliginiń málimetinshe, «Tank bıatlony» konkýrsyndaǵy jeke jarys aınalymynyń sátti ótýi, «Álem jaýyngeri» áskerı-kásibı sheberlik kezeńindegi jáne «Suńqar ańshylyǵy» áýe barlaýyndaǵy birinshi oryn – Armıa halyqaralyq oıyndarynyń kezekti konkýrstyq kúniniń qorytyndylary osyndaı, dep habarlaıdy Almaty-akshamy.kz.
Máskeý mańyndaǵy «Alabıno» polıgonyndaǵy saıysta alǵashqy qazaqstandyq ekıpaj quramy kapıtan Abdýlhákim Dúısenov, 3-synypty serjant Suńǵat Sádýaqasov jáne aǵa serjant Dýman Baıjanov joǵary kásibı sheberlikterin kórsetti. «Tank bıatlony» konkýrsynyń jeke jarys aınalymynda tankıster jeńiske jetti. Qazaqstandyqtar barlyq nysandardy sátti baǵyndyryp, kedergilerdi túzetýlersiz jeńdi. Osylaısha Ázerbaıjannan, Belarýs jáne Serbıadan kelgen qarsylastaryna esh múmkindik qaldarmady.
Rázanda ótip jatqan «Desant vzvody» saıysyna qatysýshylar qoıan-qoltyq kúrestiń jekpe-jeginde kezdesti. Elimizdiń atynan shyqqan efreıtor Oljas Erjan 70 kelige deıingi salmaq dárejesinde ekinshi oryn alsa, 70-ten 80 kelige deıingi salmaq dárejesinde kapıtan Jasulan Múserkenov úshinshi oryn aldy, 80 keliden joǵary salmaq dárejesinde qazaqstandyq áskerı qyzmetshi aǵa serjant Meıirjan Qojantaev bultaryssyz jeńiske jetti. Qoıan-qoltyq urystyń qorytyndysy boıynsha reseılik desantshylar úzdik dep tanylyp, ekinshi oryn Qazaqstanǵa, úshinshi oryn Belarýs eline buıyrdy.
«Álem jaýyngeri» konkýrsynyń qatysýshylary birinshi kezeńde jaýyngerlik daıarlyq jattyǵýlarynyń keshenin oryndady. Oǵan labırıntter men úıindilerden ótýden bastap, oq atý jattyǵýlary men hımıalyq qorǵanys normatıvterin oryndaý syndy jattyǵýlardy qosqanda jalpy on bes jattyǵý túri kiredi. Áskerı-sheberlikti aıqyndaıtyn saıysta Qazaqstan áskerı qyzmetshileri úzdik atandy, Belarýs komandasynyń ókilderi – ekinshi orynda, úshinshi orynda – Reseı.
Qazaqstandyq áskerı qyzmetshiler «Suńqar ańshylyǵy» konkýrsynda áýe barlaýyn júrgizýde úzdik dep tanyldy.
Barlyq tabylǵan nysandardy obektıvti baqylaýda eń úzdik ýaqyt pen materıaldy tolyq jınap kórsetken Qazaqstan komandasy Belarýs jáne Reseı komndalaryn artta qaldyrdy.