Bul buryn-sońdy esh jerde jarıalanbaǵan qoljazba.
Qyrkúıektiń 23 kúni qazaqtyń batyry Ospan Islamuly týraly qoljazba arhıvke tapsyrylǵany týraly belgili boldy, dep habarlaıdy Almaty-akshamy.kz Baq.kz silteme jasap.
Qundy qoljazbanyń arhıvke tapsyrylǵany jaıynda Almatyda ótken konferensıa barysynda belgili boldy. Mádenıet jáne sport mınıstrligine qarasty Ortalyq memlekettik ǵylymı-tehnıkalyq qujattama arhıvinde «Qazaqtyń altyn ańyzy – Ospan batyr jáne Nurǵojaı batyrdyń murasy» atty halyqaralyq ǵylymı-tájirıbelik konferensıa ótti.
Ospan batyr Islamulynyń el men jer úshin jasaǵan janqıarlyǵy, Qytaıdyń Gomın jáne komýnıstik úkimetimen qan keship júrip urys salǵan ult qaharmanynyń saıası áreketi, sondaı-aq, Nurǵojaı batyrdyń erlikteri men murasy konferensıanyń basty taqyryby boldy.
Konferensıadaǵy eleýli oqıǵalardyń biri Stambul qalasynan arnaıy kelgen Nurǵojaı batyrdyń nemeresi Bahadúr Hadjıhan men Mımar Sınan kórkem óner ýnıversıtetiniń profesory Ábdiýaqap Qara Ospan batyr týraly Nurǵojaı batyrdyń túpnusqa qoljazbasyn arhıv qoryna syıǵa tartqany boldy. Aıta keteıik, qoljazba Nurǵojaı batyrdyń óz qolymen tóte jazýmen jazylǵan ári bul buryn-sońdy esh jerde jarıalanbaǵan.
«Qazaqtyń HH ǵasyrǵa tańbasyn basqan sońǵy batyry, Shyǵys Túrkistanda halqynyń egemendigi men azattyǵy jolynda kúresken Ospan batyr Islamulynyń qazaq tarıhynda alar orny óte zor. Amerıkalyq tarıhshy Lında Benson «Qazaqtyń altyn ańyzy» dep ataǵan Ospan Batyr búkil Altaı jerin jáne Shyǵys Túrkistandaǵy qazaqtardy ezip janshyp turǵan Qytaı gýbernatory Shyń Shy Saıdan azat etýge kúsh salǵan. Osy tusta aıta keteıik, kúresker tulǵanyń ómir jolyn jańa, tyń qyrlarynan tanytatyn Ospan batyrdyń alǵashqy segiz komısarlarynyń biri Nurǵojaı batyrdyń estelikteri úlken tarıhı mańyzǵa ıe. Óıtkeni Nurǵojaı batyr Ospan batyrdyń janynda bolǵan. Sondyqtan osy eki alyp tulǵany birge nasıhattaýdy maqsat etken bolashaq urpaqty rýhanı turǵydan baı, eljandy etip qalyptastyrýǵa yqpal eteri sózsiz», - deıdi Ortalyq memlekettik ǵylymı-tehnıkalyq qujattama arhıviniń dırektory Baıan Jumataeva.
Aıta keteıik, atalǵan tarıhı qujat arhıv qyzmetkerleriniń Túrkıaǵa issapary barysynda «Arhıv – 2025» keshendi baǵdarlamasyn júzege asyrý aıasynda, Qazaqstan tarıhyna qatysty qujattar men materıaldardyń kóshirmelerin, túpnusqalaryn anyqtaý barysynda júzege asyrylyp otyr.