Jalpy saılaýshylar sany 11 mln 953 myń 465 adamdy qurady.
Qazaqstannyń Ortalyq saılaý komısıasy 22 qarashada prezıdent saılaýynyń túpkilikti qorytyndysyn jarıalady, dep habarlaıdy Almaty-akshamy.kz.
OSK tóraǵasy Nurlan Ábdirovtiń dereginshe, Qasym-Jomart Toqaevqa 6 mln 456 myń 392 saılaýshy nemese olardyń 81,31%-y daýys bergen. «Bárine qarsymyn» baǵanyn 460 484 nemese 5,8% saılaýshy tańdaǵan.
Sonymen birge, Jıgýlı Daırabaevqa 271 641 nemese 3,42 paıyz, Qaraqat Ábdenge 206 myń nemese 2,6 paıyz, Meıram Qajykenge 200 907 nemese 2,53 paıyz, Nurlan Áýesbaevqa 176 116 nemese 2,22 paıyz jáne Saltanat Tursynbekovaǵa 168 731 nemese 2,12 paıyz daýys berilgen.
Naqtylanǵan saılaýshylar tizimderine saı, jalpy saılaýshylar sany 11 mln 953 myń 465 adamdy qurady. Onyń 8 mln 300 myń 46 adamy nemese 69,44 paıyzy daýys berýge arnalǵan búlletenderdi aldy. Daýys berý kúni QR Prezıdenttigine kandıdattardyń 11 myńnan asa senim bildirgen adamdary, sheteldik halyqaralyq uıymdardyń 641 baıqaýshysy, saıası partıalardyń 15,5 myńnan asa baıqaýshysy, qoǵamdyq birlestikterden 30 myńnan asa baıqaýshy saılaý barysyn baqylady. Saılaý ýchaskelerinde 1225 qazaqstandyq BAQ ókilderi, 23 eldiń 41 sheteldik BAQ-tyń akkredıttelgen jýrnalıseri aqparat taratty.
Aıta keteıik, 20 qarashada elimizde kezekten tys prezıdent saılaý ótti. Barlyq óńirde 10 033 ýchaske jumys istedi. Al shet memleketterdegi Qazaqstan ókildikteri janynda 68 ýchaske qurylǵan.
Elimizdegi búkil saılaýshylardyń 69 paıyzy nemese 8 mln 282 myńnan astam adam óz tańdaýyn jasady.
«Osylaısha, saılaýdyń keshe jarıalanǵan aldyn ala qorytyndylary resmı kelip túsken hattamalarmen rastaldy. QR-daǵy saılaý týraly Konstıtýsılyq zańnyń 9-baby 1-tarmaǵyna, 65-babyna sáıkes, daýys berýge qatysqan saılaýshylardyń 50 paıyzdan astamynyń daýysyn alǵan kandıdat respýblıka prezıdenti bolyp sanalady. Osylaısha, 2022 jylǵy 20 qarashadaǵy kezekten tys saılaýda Qasym-Jomart Kemeluly Toqaev QR Prezıdenti bolyp saılandy», - dedi Nurlan Ábdirov.