Ortalyq referendým komısıasynyń tóraǵasy Nurlan Ábdirov referendým ýchaskelik komısıalary daýys berý kúni, ýaqyty, orny jáne tártibi týraly azamattarǵa daýys berý kúninen keminde 10 kún buryn, ıaǵnı osy jyldyń 26 qyrkúıegine deıin habarlaý kerek ekenin atap ótti.
Osy naýqan barysynda komısıalar daýys berý quqyǵy bar azamattardy referendýmǵa jeke shaqyrýǵa erekshe kóńil bóldi. Shaqyrýlardyń biryńǵaı formasyn Ortalyq referendým komısıasy aýmaqtyq komısıalarmen birlese otyryp ázirledi.
Keıin aýmaqtyq komısıa tóraǵalary daýys berý kúnine daıyndyq, azamattardy aqparattandyrý jáne keıbir ýchaskelerde daýys berý ýaqytynyń ózgerýi týraly qabyldanǵan sharalar jaıynda baıandady.
Ortalyq referendým komısıasynyń tóraǵasy Nurlan Ábdirov referendýmǵa daıyndyq barysyn halyqqa keńinen jetkizýdiń mańyzdylyǵyn atap ótti.
Referendýmǵa daıyndyq pen ony ótkizý týraly tolyq ári naqty aqparat alý úshin Ortalyq referendým komısıasy aqparattyq materıaldar (beıne, aýdıorolıkter, plakattar jáne ádistemelik quraldar) ázirledi. Sonymen qatar, azamattardy qosymsha habardar etý úshin SMS-habarlamalar jáne mobıldi bankterde PUSH-habarlamalar jiberý josparlanǵan. Bul jumys daýys berý kúnine deıin jalǵasady.
Nurlan Ábdirov sondaı-aq respýblıkalyq referendýmǵa qatysty qoǵamdyq pikirge saýalnama júrgizýdiń zańnamalyq talaptaryn da atap ótti. Saılaý jáne referendým týraly zańdarǵa sáıkes, daýys berý kúnine deıingi bes kún ishinde jáne daýys berý kúninde referendým nátıjeleri týraly qoǵamdyq pikirdi, boljamdardy nemese basqa zertteýlerdi buqaralyq aqparat quraldarynda nemese ınternet platformalarda jarıalaýǵa tyıym salynatynyn eske saldy.