AES qurylysy boıynsha Halyq shtabynyń músheleri temirbeton buıymdary men elektr jelisin salýǵa arnalǵan konstrýksıalar shyǵaratyn "Temirbeton" JSHS zaýytynda qurylys salasynyń ókilderimen kezdesý ótkizdi.
AES boıynsha daýys berý qurylysshylar úshin tek mańyzdy memlekettik jobany qoldaý ǵana emes, sonymen qatar olardyń kásibı qyzmeti men ekonomıkalyq ál-aýqatyn damytýǵa tikeleı úles bolyp tabylady.
Stansıanyń qurylysyna myńdaǵan bilikti jumysshylar men qurylys salasyndaǵy mamandar qajet. Sonymen birge AES jobasyn júzege asyrý atom stansıasynyń qurylysy ǵana emes, sonymen qatar oǵan qosa júretin ınfraqurylymdy, qyzmetkerlerge arnalǵan turǵyn úılerdi jáne áleýmettik ınfraqurylym nysandaryn damytý jumystaryn qamtıdy. Demek, "Temirbeton" sıaqty kásiporyndar birneshe jylǵa deıin tapsyrystarmen qamtamasyz etiledi.
Senat spıkeri Máýlen Áshimbaev eńbek ujymymen kezdesýde Qazaqstan úshin atom energetıkasyn damytý jáne atom elektr stansıasyn salý mańyzdy ári strategıalyq mánge ıe ekenin túsindirdi. Elektr energıasyn tutynýdyń ósýi álemdik úrdis bolyp tabylady. Bizde qazir elektr energıasynyń tapshylyǵy shamamen jylyna 2,5 mlrd kVt/saǵ quraıdy. Qazirdiń ózinde jyl saıyn shamamen 4-5 mlrd kVt/saǵ elektr energıasyn ımporttap otyrmyz. Sondyqtan elektr energıasy kózderin ártaraptandyrý mańyzdy ról atqarady.