Almaty qalasynyń Túrksib aýdanyndaǵy №83 gımnazıada «Qazaqstan balalary» jobasy aıasynda jas sýretshiler baıqaýy ótti. Sharany Almaty qalasy Tótenshe jaǵdaılar departamenti uıymdastyrdy.
Baıqaýdyń basty maqsaty – balalarǵa órt qaýipsizdigi jóninde túsinik berý, órt sóndirýshilerdiń kúndelikti janqıarlyq eńbegin baǵalaýǵa baýlý boldy. Balalar óz qıaldaryndaǵy órt sóndirýshi beınesin qaǵaz betine túsirip, «tilsiz jaýǵa» qarsy kúresti boıaýlarmen beıneledi.
Jas sýretshiler órt sóndirýshilerdiń batyl áreketterin kórkem tilmen jetkizýge tyrysyp, ár týyndyda otqa qarsy turýdyń mańyzdylyǵyn uǵyndyra bildi.
– Bul baıqaý balalar úshin ǵana emes, ata-analar úshin de paıdaly boldy, – deıdi №83 gımnazıa dırektorynyń tárbıe isi jónindegi orynbasary Vera Kazanseva.
– Balalar sýret sala otyryp, órt kezinde ne isteý kerektigin, qutqarýshylardyń erlik isterin úırenip, túsindi. Baıqaýǵa Túrksib aýdanynyń mektepterinen alpysqa jýyq oqýshy qatysty. Qorytyndysyn kásibı sýretshiler shyǵarady. Jeńimpazdar men júldegerlerge gramotalar tabystalady. Alaıda eń mańyzdysy – balalar órttiń aldyn alý men qaýiptiń aldyn qalaı alý kerektigin túsindi.
Baıqaý Halyqaralyq balalardy qorǵaý kúnine arnalǵan is-sharalar aıasynda uıymdastyrylǵan. Mundaı tárbıelik máni zor bastamalar balalardyń qaýipsizdik mádenıetin qalyptastyrýda mańyzdy ról atqaratyny sózsiz.