Jasandy ıntellekt aýrýlardy dál dıagnostıkalap qana qoımaı, jańa dári-dármek jasaýǵa da kómektese alady.
Google kompanıasy jasandy ıntellekttiń (JI) medısınadaǵy áleýeti týraly óz blogynda bólisti. Kompanıanyń málimdeýinshe, JI qazirgi jáne bolashaqtaǵy densaýlyq saqtaý júıesin múlde jańa deńgeıge kótere alady.
Sımptom arqyly dıagnoz qoıý – endi ońaı
Google-diń aqyldy izdeý júıesi paıdalanýshy kórsetken belgiler negizinde yqtımal dıagnoz usyna alady. Bul júıe tek mamandar bergen aqparatpen shektelmeı, basqa qoldanýshylardyń da izdeý tarıhyn eskerip, relevantty nátıjeler usynady.
Health Connect: dárigerler arasyndaǵy kópir
Kompanıa atap ótken mańyzdy jobalardyń biri – Health Connect API. Bul qural dárigerlerge túrli elderden aýrý jaǵdaılaryn tirkeýge jáne áriptesterimen bólisýge múmkindik beredi. Osylaısha, jahandyq medısınalyq tájirıbe ortaq bazaǵa jınalady.
Ǵylymı ádebıetti saraptap, gıpoteza usynady
Google JI modelderi úlken kólemdegi ǵylymı materıaldardy taldap, aýrýlardy dıagnostıkalaý barysynda dáleldi gıpotezalar usynýǵa qaýqarly. Sonymen qatar, Gemma dep atalatyn JI modeli jańa dárilerdi ázirleýde zertteýshilerge kómek kórsetedi.
Onkologıa jáne aqyldy saǵattar
Google onkologıalyq aýrýlarǵa qarsy preparattardy izdeýde JI-di qoldanýda. Bul baǵyttaǵy zertteýler Nıderlandtaǵy aýrýhanalarmen birlese júrgizilip jatyr.
Al Google Pixel Watch 3 saǵattaryndaǵy JI júrek-qan tamyrlary aýrýlaryn erte anyqtap, júrek toqtaý belgilerin baıqaǵan jaǵdaıda jedel járdem shaqyrý fýnksıasyn atqara alady.
Jasandy ıntellekt – medısınadaǵy keleshegi zor qural. Google-diń málimdeýinshe, JI tek qana densaýlyq saqtaý júıesin jeńildetip qoımaı, adam ómirin saqtap qalýǵa da úlken úles qosa alady.