Tabıǵatqa 65,7 mln teńge mólsherinde zalal keltirilgen
Shyǵys Qazaqstan oblysynda tabıǵatqa 65,7 mln teńge zalal keltirgen ormanshylar men kásipkerler sottaldy, dep habarlaıdy Almaty-akshamy.kz.
Óskemen qalasynyń № 2 soty baspasóz qyzmetiniń málimetine súıensek, «Óskemen orman sharýashylyǵy» kásipornynyń laýazymdy tulǵalaryna qyzmettik ókilettigin asyra paıdalandy degen aıyppen qylmystyq is qaralǵan. Sondaı-aq olardyń biri bopsalaý arqyly birneshe ret para alǵany úshin aıypty boldy.
Budan bólek, A. jáne Sh. esimdi kásipkerlerge qatysty aǵashtardy zańsyz kesip, iri kólemde zıan keltirý faktisi boıynsha sot isi qaraldy. Belgili bolǵandaı, olardyń zańsyz áreketteriniń kesirinen tabıǵatqa 65,7 mln teńge mólsherinde zalal keltirilgen. Sot barysynda aıyptalýshylar óz kinálaryn tolyqtaı moıyndady.
«Óskemen orman sharýashylyǵynyń» dırektory aýdandyq orman sharýashylyǵy mekemeleri basshylarymen sóz baılasyp, 2020 jyldyń mamyr aıynan 2021 jyldyń aqpanyna deıingi aralyqta Sh. men A.-ǵa zańsyz aǵash kesýge múmkindik bergen. Sot orman sharýashylyǵy mekemeleriniń qyzmetkerlerine túrli jaza taǵaıyndady. Sonyń ishinde «Óskemen orman sharýashylyǵynyń» basshysy 3 jylǵa bas bostandyǵynan aıyryldy. «Sot úkimi boıynsha ormanshylar 1 jyl 6 aıdan – 3 jylǵa deıingi merzimge bas bostandyqtarynan aıyryldy. Sondaı-aq olarǵa ómir boıyna memlekettik qyzmette jumys isteýge tyıym salyndy. Al kásipkerler Sh. jáne A. 3 jyl merzimge aǵash kesý salasynda jeke kásipkerlikpen aınalysý quqyǵynan aıyrylyp, 50 AEK mólsherinde aıyppul tóleýge mindetteldi. Úkim zańdy kúshine engen joq», - delingen aqparatta.