Qazaqstan turǵyn úı kompanıasy úleskerdiń ınvestısıalaryna kepildik beredi.
Qazaqstanda aımaqtarǵa arnalǵan jańa "Orda Aımaq" ıpotekalyq baǵdarlamasy iske qosylady, dep habarlaıdy aqshamnews.kz Qazaqstan turǵyn úı kompanıasyna silteme jasap.
Qazaqstan turǵyn úı kompanıasy bıyl 7 sáýirden bastap ıpotekalyq nesıelendirýdiń "Orda Aımaq" baǵdarlamasyn iske qosady. Kompanıa kepildigimen qurylysqa úlestik qatysý týraly shart boıynsha salynyp jatqan turǵyn úıdi satyp alýǵa bolady. Iaǵnı úleskerdiń ınvestısıalaryna kompanıa kepildik beredi. Qurylys aıaqtalmaǵan nemese qurylys kompanıasy bankrot bolǵan jaǵdaıda, Qazaqstan turǵyn úı kompanıasy baspananyń salynyp bitýine kepil bolady.
"Ótinimder "Otbasy Banki" ýákiletti agentteri arqyly qabyldanady. 21 jastan asqan Qazaqstannyń kez kelgen azamaty qaryz alýshy bola alady. "Orda Aımaq" baǵdarlamasynda "Otbasy Bankte" depozıttiń bolýy, qaryz alýshyǵa qoıylatyn talap pen turǵyn úıdiń bolýy týraly shekteý qoldanylmaıdy", - deıdi kompanıa.
Baǵdarlamanyń negizgi artyqshylyqtary:
15,9 % mólsherinde belgilengen syıaqy;
jyldyq tıimdi syıaqy mólsherlemesi 17,26 %-ten 22,81 %-ke deıin.
Ikemdi sharttar:
bastapqy jarna 20% bastap;
qaryz somasy 1 mln teńgeden 75 mln teńgege deıin;
qaryz merzimi 12 aıdan 240 aıǵa deıin.
Salynyp jatqan turǵyn úıdiń baǵasy daıyn turǵyn úıge qaraǵanda tómen. Jańa qurylys obektileriniń sıpattamasymen sondaı-aq satý bólimsheleri men konsýltanttardyń baılanystarymen QTK turǵyn úı portalynda tanysýǵa bolady.