Forbes jýrnaly álemdegi eń baı adamdardyń jańartylǵan tizimin jarıalady.
Oǵan Qazaqstannan alty adam endi. Olardyń beseýiniń baılyǵy AQSH-tyń burynǵy prezıdenti Donald Tramptan asyp tústi, dep habarlaıdy aqshamnews.kz.
Qazaqstandyqtardyń arasynda kósh basyna Vácheslav Kım jaıǵasty – ol 464-orynda, onyń baılyǵy 7,1 mıllıard dollar dep baǵalanady. Forbes saıtynyń málimetinshe, Kım – Qazaqstandaǵy eń iri fınteh-kompanıa sanalatyn Kaspi.kz aksıoneri jáne dırektorlar keńesiniń tóraǵasy.
Mıhaıl Lomtadze 597-orynǵa ıe boldy, onyń baılyǵy 5,9 mıllıard dollar dep baǵalanǵan.
Úshinshi orynda Tımýr Týrlov tur – ol 605-orynǵa jaıǵasqan, onyń baılyǵy 5,8 mıllıard dollar. Týrlov – Freedom Holding-tiń negizin qalaýshy jáne bas dırektory. Bul kompanıa Qazaqstanda, Ortalyq Azıada, Eýropa men AQSH-ta qarjylyq qyzmet kórsetedi.
Tizimde Vladımır Kım de bar – ol 620-orynda, onyń baılyǵy 5,7 mıllıard dollar. Vladımır Kım – «Qazahmys» holdıńiniń prezıdenti.
673-orynda Dınara jáne Tımýr Qulybaevtar ornalasqan. Olar Halyk Bank pen «Almeks» holdıńtik tobynyń negizgi ıeleri. Olardyń baılyǵy 5,3 mıllıard dollar dep baǵalanady.
Qazaqstandyqtardan tizimdi Bolat Ótemuratov qorytyndylady. Ol 3,7 mıllıard dollar baılyqqa ıe. Forbes-tiń málimetinshe, Ótemuratov – qonaq úı bıznesi men Kar-Tel, sondaı-aq qyrǵyzstandyq Sky Mobile mobıldi baılanys operatorlaryna ınvestısıa salǵan kásipker.
Aıta keterligi, AQSH-tyń burynǵy prezıdenti Donald Tramp bul tizimde 711-orynda, onyń baılyǵy 4,9 mıllıard dollar dep kórsetilgen.