Búgin - jazýshy-dramatýrg, Qazaqstan Respýblıkasy memlekettik syılyǵynyń laýreaty Oralhan Bókeıdiń týǵan kúni. Oralhan Bókeıdiń oılaryn oqı otyryńyz.
***
Tek qana alǵa, alǵa ǵana týra tartqan, jastyq pen jaltaqtyqtan ada asaý batyldyq, baltalasań da qyń etpes batyrlyq syqyldy bolǵanymen, kósegemizdi kógertpes kókbettikke boı aldyrar kisápirliktiń kórigin kóbirek basyp júrgen joqpyz ba?!
***
Mahabbat - tábıǵat ózi bergen qudiretti sezim. ondaǵy eń úlken syılyq - aınymas syılastyq. ol árkimge de tán qasıet, al naǵyz syılastyq kez-kelgenniń qolynan kelmeıdi...
***
Baqyt degenimiz ár tańdy tiri qarsy alyp, ár kúndi kózimizben shyǵaryp salý. ózgeniń bári ózińdi aldaý úshin tapqan qıturqylar...
***
Bizdiń biletinimiz: zamana kóshi baısaldanyp, baıandy ǵumyr keshken saıyn, ómir súrý jeńildep, saýyq-saıran kóbeıgen saıyn, sanamyz sarabdal tartyp, tańǵajaıyp oqıǵanyń kýási bolǵan saıyn qulqynymyzǵa qum túskendeı qatal da, qaıyrymsyz, eshkimge de, eshnársege de senbeıtin sezimsiz "Sergektik" jaılaǵandaı edi...
***
Der kezinde óle bilýden úlken ónerdiń joq ekeni sol, ondaı jańǵyryp qaıta týar, qaıta jasar ımandy talantty sizge jazbaǵan, siz bar bolǵany jer betimen qı domalatqan qońyz pende ǵanasyz, qandaı aıanyshty múskindik...
***
Myqty bolsań qaıtalama meniń ómirimdi, bóriniń artynan bóltirik aqyldylyǵynan erip júrgen joq.
***
Máńgilikke ulasatyn ulylyq - jalǵan dúnıeni maısha shylqyǵan jalpaq tabanymen jalpaǵynan basý emes, tipti, ilinip-salynyp aljyǵansha jasaýda emes, artyńa óshpes iz qaldyryp, arǵymaqqa mingendeı asyǵys zýlap óte shyǵý, ıaǵnı óz ómirińdi oqys ári ádemi aıaqtatý.
***
Baqılyq ǵumyryńa jeter qaıǵy men qýanysh adam basynda ólsheýli ǵana bolady.
***
Biz qatigezdenip baramyz, biz ımansyzdanyp baramyz, biz aınalaıyn anamyzdyń aq sútin aqtaı almaı júrmiz. Biz babamyzdyń batasyn umyttyq, biz tarıhymyzdy taspen bastyryp, bir kúni qyz-qyzdy qyzyqqa mastanyp tasyrańdadyq, kózimizdi shel basty, kóńilimiz kór, jigerimiz qum bolyp qurdym dáýrenniń áláýlaıyn shyrqap júrmiz... Berekesi de beker ishim-jemniń quly bolsaq, biz úshin jalǵyz janyn sadaqalaǵan ata-baba árýaǵynan uıat emes pe?! Iá, árýaqqa adaldyq, ótkenge ıman bolmaıynsha tirilerge salaýat joq. Tipti biz kúni búginge deıin ulttyq adamgershilik, ımandyq bet-beınesi men bolmysyn, kelbeti laıyqtylyǵyn anyqtaı almaı júrmiz...
Derekkózi: massaget.kz