Elordada halyqaralyq «EURASIAN BOOK FAIR — 2023» kitap kórme-jármeńkesi ótip jatyr.
Jármeńkege TMD, Eýropa men Azıa elderiniń baspa úıleri, kitap dúkenderi, ǵylymı-bilim berý jáne polıgrafıa kompanıalary qatysyp jatyr. Qýantarlyǵy kelýshilerdiń qatary kóp, dep habarlaıdy Almaty-akshamy.kz Egemen.kz-ke silteme jasap.
Egemen.kz tilshisi osy tusta qazaq oqyrmandarynyń ne oqyp júrgenin tanymal baspa úılerinen surap kórgen:
«Folıant» baspasy: Qazir oqyrman suranysy ártúrli. Biraq, qazaq jazýshylary kóp oqylady. Sonyń ishinde eń kóp suranysta dep Dýlat Isabekovtyń «Qarǵyn» kitabyn aıtýǵa bolady. Jastar kóp oqıdy. Odan keıin tarıhı kitaptar, máselen, «Kóshpendilerdi» suraıdy. Muhtar Maǵaýınniń kitaptaryn alady. Ǵabıt Músirepovtyń «Ulpan» romany da oqylymdy. Abaı Qunanbaıulynyń qara sózderin izdep jatady.
Bizde balalar ádebıeti de suranysqa ıe. Sonyń ishinde mektep jasyndaǵy balalar «Meniń atym Qojany» jaqsy kóredi.
«Mazmundama» baspasy: Bizde kóbine motıvasıalyq, psıhologıalyq kitaptar suranysqa ıe. Oqyrmandar sol baǵyttaǵy kitaptardy kóp alady. Sońǵy kezderdegi top-3 kitapty atap ótýge bolady. Qazir bizde birinshi orynda jaqynda jaryq kórgen Perızat Myrzahmettiń «Ómirdiń aty M» kitaby bolsa, ekinshi orynda «Tarmaqtar» jobasy shyǵarǵan kitap. Kóp oqyrman izdep keledi. Ol kitapta qazaq aqyndarynyń óleń joldary jazylǵan ári kitaptaǵy QR arqyly óleńdi tyńdaýǵa bolady. Al úshinshi orynda «Ferrarıin satqan monah» kitaby der edim. Odan keıingi tizimdi motıvasıalyq, psıhologıalyq kitaptarmen jalǵastyrýǵa bolady.
«Qasym kitap» baspasy: Bizdiń kitaptar - klasıkalyq ádebıetter. Iaǵnı oqyrmandarymyz da klasıkany jaqsy kóretin, izdep oqıtyndar. Jas oqyrmandarymyz óte kóp. solardyń arasynda Dýlat Isabekovtyń «Qarǵyn», «Gaýhartas» romandary men Ázilhan Nurshaıyqovtyń «Mahabbat, qyzyq mol jyldar» romany óte kóp oqylady.
«Otbasy hrestomatıasy» baspasy: Bizdegi eń oqylymdy, suranysqa ıe kitap - ol «Beısen jáne bolmys». Odan keıin ata-ana men balaǵa arnalǵan kitabymyz bar. İshinde kún saıyn oryndaýǵa arnalǵan tapsyrmalary bar, shaǵyn ertegisi bar, hıkaıasy bar, bir oqıǵasy bar, Ybyraı Altynsarınniń, Ahmet Baıtursynulynyń mysaldary bar. 30 sabaqtan turatyn jınaq. Odan keıin kezinde Alash azamattary aýdarǵan áńgimelerdi shyǵarǵanbyz. Ol da suranysta, óz oqyrmandary bar.