İİM Maqan Esbolatov atyndaǵy Almaty akademıasy Halyqaralyq yntymaqtastyq jónindegi German qoǵamy men qalanyń polısıa departamentiniń qoldaýymen “Jastar jáne polısıa: zorlyq-zombylyq ekstremızmi jáne basqa da zamanaýı qaýipterdiń aldyn alý” taqyrybynda respýblıkalyq forým ótkizdi.
Úsh kúnge sozylǵan sharaǵa elimizdiń ár aımaǵynan kelgen 500-ge jýyq mektep oqýshylary men stýdent jastar qatysty, dep habarlaıdy Almaty-akshamy.kz Polisia.kz-ke silteme jasap.
Polısıa qyzmetine qyzyǵa qarap, qoǵamnyń qaýipsizdigi úshin alańdaıtyn bilimdi jastar – forým qatysýshylarymen İshki ister mınıstri kezdesti. Ol jetkinshektermen kıberqylmysqa qarsy kúres, quqyqbuzýshylyqtardyń aldyn alý, vedomstvonyń oqý oryndaryna oqýǵa túsý syndy taqyryptarda sóz qozǵady.
«Jarqyn bolashaqqa úmittengen jastar qazirgi zamanaýı tehnologıalardy qoldana otyryp, kıberqylmystar men ınternet arqyly jasalatyn quqyq buzýshylardyń qalaı aldyn alý kerektigi týraly ózderiniń oı-pikirlerin bildirdi. Búgingi tańda İİM Qoǵamdyq qaýipsizdikti qoǵammen seriktestikte qamtamasyz etý tujyrymdamasyn ázirlep jatyr. Osy forýmnyń ózin sonyń kýási dep tolyq aıtýǵa bolady», – dedi Marat Ahmetjanov.
Kezdesý barysynda qyzdar men jigitter alǵyrlyqtaryn dáleldep, belsendilik tanytyp, mınıstrge óz saýaldaryn joldady.
Jıyn sońynda Marat Ahmetjanov Almaty akademıasy uıymdastyrǵan “Úzdik IT-daryn”, “Úzdik iz kesýshi” baıqaýlarynyń jeńimpazdaryn marapattady.
«Baıqaýdyń birinshi-ekinshi týry onlaın ótti. Vıdeo jasap, suraqtaryna jaýap berip, keıin osy Almaty qalasynda ótken úshinshi týryna qatystyq. Almaty akademıasyna, barlyq uıymdastyrýshylarǵa raqmet aıtamyn», – dedi İİİ oryn ıelengen Islam Serikovtyń jetekshisi – Qaraǵandy oblysy A.Asylbekov atyndaǵy jalpy bilim beretin mekteptiń muǵalimi Gúlshat Abaeva.
Sonymen qatar İİM basshysy akademıanyń 1-shi fakúltetinde bilim alýshy ofıserlermen kezdesti. Aıta ketý kerek, bul fakúltette ishki ister organdarynyń basshy quramy daıarlaýdan ótedi.