Mektepke kirý, oqý materıaldarynyń qoljetimdiligi men asqanada tamaqtaný.
QR Premer-Mınıstriniń orynbasary Tamara Dúısenovaǵa oqýshylarǵa arnalǵan ID-kartalar is júzinde qalaı jumys isteıtini kórsetildi, dep habarlaıdy Almaty-akshamy.kz.
QR Premer-Mınıstriniń resmı aqparattyq resýrsynyń málimetinshe, júıe pılottyq rejımde elordalyq №95 mektep-lıseıinde engizilgen bolatyn. Munda kartadan bólek, bıometrıalyq taný múmkindigi de qarastyrylǵan. Bul degenimiz – eger oqýshy qandaı da bir sebeppen kartasyn umytyp ne joǵaltyp alǵan jaǵdaıda, ǵımaratqa bet-júzin taný qurylǵysy arqyly kire alady.
«Bir karta arqyly oqýshy kitaphanadaǵy oqý materıaldaryn alady, mektep asqanasynda tamaq satyp alady, qalalyq avtobýs qyzmetin paıdalanady», — dedi oqý-aǵartý vıse-mınıstri Aıbat İlıasov.
Karta men bıometrıa múmkindikteri vıse-premerge kórsetildi. Atap óteıik, astanalyq mektepte bastaýysh synyptarda bilim alatyn 900-ge jýyq bala men áleýmettik jaǵynan az qamtylǵan otbasylarda tárbıelenip jatqan 36 oqýshyǵa tegin tamaq qarastyrylǵan. Al karta qoldaný jónindegi málimetter tek ata-analarǵa ǵana qoljetimdi bolady.
«Sıfrlandyrý biz úshin óte mańyzdy. Bul júıeniń ashyqtyǵyn qamtyp, oqýshy men ata-ana úshin yńǵaıly jaǵdaı jasap qana qoımaıdy. Munda balalardyń qaýipsizdigi máselesi de bar», — dedi Tamara Dúısenova.
Sonymen qatar mundaı júıeler pılottyq rejımde Shymkent qalasynda, Mańǵystaý jáne Aqtóbe oblystaryndaǵy mektepterde jumys istep tur. Oqý-aǵartý mınıstrligi keler jyldan bastap tehnologıany ózge óńirlerde engizýdi josparlap otyr.