26-27 qarasha kúnderi Ashhabad qalasynda QR Kólik vıse-mınıstri Talǵat Lastaev jáne Túrkimenstan Mınıstrler kabıneti janyndaǵy Kólik jáne komýnıkasıa agenttigi bas dırektorynyń orynbasary Batyr Annaevtyń teń tóraǵalyǵymen kólik, tranzıt jáne logıstıkany damytý máseleleri jónindegi Qazaqstan-Túrkimenstan birlesken jumys tobynyń birinshi otyrysy ótti, dep habarlaıdy Almaty-akshamy.kz.
Jumys tobynyń otyrysy sheńberinde kólik, tranzıt jáne logıstıka salasyndaǵy yntymaqtastyq máseleleri talqylandy. Sondaı-aq otyrys qorytyndysy boıynsha Qazaqstan Respýblıkasynyń Kólik mınıstrligi men Túrikmenstan Mınıstrler kabıneti janyndaǵy Kólik jáne komýnıkasıalar agenttigi arasynda kólik salasyndaǵy ózara baılanys týraly Memorandýmǵa qol qoıyldy.
Memorandým eki el arasyndaǵy temirjol jáne teńiz kóligi salasyndaǵy yntymaqtastyqty keńeıtýdi kózdeıdi. Atap aıtqanda, qolaıly tarıftik jaǵdaılar jasaý, ınfraqurylymdy damytýdy úndestirý, ózara aqparatpen almasý úshin sıfrlyq sheshimderdi engizý jóninde birlesken sharalar qabyldaýdy qosa alǵanda, eki eldiń aýmaqtary boıynsha tasymaldaý kólemin arttyrý máseleleri qamtylatyn bolady.
Sonymen qatar jumys tobynyń otyrysy barysynda taraptar «Qytaı – Qazaqstan – Túrikmenstan – Iran» dálizin birlesip damytý týraly ýaǵdalasty. Eki tarap sonymen birge «Soltústik-Ońtústik» dálizi tranzıttik jáne eksporttyq júkter aǵymynyń mańyzdy baǵyttarynyń biri bolyp tabylatynyn atap ótti. Aıta keterligi, jalpy osy jyldyń 10 aıynyń qorytyndysy boıynsha atalǵan dáliz boıynsha júkterdi tasymaldaý kólemi 15%-ǵa ulǵaıyp, 1,7 mln tonnany qurady.
Kún tártibine sáıkes taraptarmen temirjol qatynasy salasynda ıkemdi básekege qabiletti tarıftik saıasatty qalyptastyrý máselesi kóterip, bul baǵytta atqarylǵan jumystyń oń nátıjeleri sóz boldy. Kezdesý sońynda eki el arasyndaǵy kólik, tranzıt jáne logıstıka salasyndaǵy ózara yntymaqtastyqty odan ári damytýdyń mańyzdylyǵy erekshe atalyp ótti.
Ashhabad qalasyna jumys sapary aıasynda kólik vıse-mınıstri T.Lastaev kólik salasyna qatysty ózekti máseleler qozǵalǵan halyqaralyq konferensıa men kólik salasyndaǵy halyqaralyq yntymaqtastyqty nyǵaıtýǵa baǵyttalǵan tıisti kórmege qatysty.