Oqý-aǵartý mınıstri Ǵanı Beısembaev osylaı dep málimdedi.
Balalardyń jazǵy demalysyn uıymdastyrýǵa bilim basqarmalarynyń basshylary jaýapty bolady, dep habarlaıdy Almaty-akshamy.kz
Búgin Oqý-aǵartý mınıstrliginiń aparattyq keńesinde óńirlik bilim basqarmalary, vedimistik baǵynysty uıymdar jáne ádistemelik kabınet basshylarynyń qatysýymen "Jaz-2024" balalardyń saýyqtyrý demalysyn, bos ýaqytyn jáne jumyspen qamtylýyn uıymdastyrý máseleleri talqylandy.
Oqý-aǵartý mınıstrligi İİM, DSM, TJM, MAM, TSM, ǴJBM, EHÁQM jáne ETRM-men birlesip zańnamalyq normalardy, baǵdarlamalardy, sondaı-aq monıtorıń pen baqylaýdy qamtıtyn is-sharalar josparyn qabyldady. Bıyl birinshi ret lagerler úshin biryńǵaı talaptar ázirlendi, qosymsha bilim berý salasyndaǵy eriktiler men pedagogter jumysqa tartyldy, lagerlerdi qabyldaý men nusqama ótkizýdiń respýblıkalyq monıtorıńi quryldy. Sondaı-aq ýákiletti memlekettik organdary bekitken balalardy saýyqtyrý ortalyqtarynyń tizilimi joldandy.
"Balalardyń qaýipsizdigin basty nazarǵa ala otyryp, jazǵy demalysty ótkizý mádenıetin qalyptastyrý qajet. Sondyqtan áriptester, balalardy qorǵaý sharalaryn qatań baqylaýǵa alyp, jumysty kúsheıtý kerek. Sizderge tıisti ádistemelik quraldar men algorıtmder joldandy. Balalardyń jazǵy demalysyn uıymdastyrýda bilim basqarmalarynyń basshylaryna jeke jaýapkershilik júkteımin", - dep atap ótti oqý-aǵartý mınıstri Ǵanı Beısembaev.
Bıylǵy jazda barlyǵy 3,1 mln balany, ıaǵnı oqýshylardyń 88,2%-yn demalyspen qamtý josparlanýda. Olar úshin 10 630 demalys ortalyǵy ázirlendi.