Onyń 101-i Túrkistan oblysyna jóneltiledi.
Elimizde mektebi joq nemese bastaýysh mektebi ǵana bar aýyldardyń balalaryn jaqyn mańdaǵy bilim berý uıymdaryna qaýipsiz tasymaldaý úshin 515 jańa avtobýs satyp alynady, dep habarlaıdy Almaty-akshamy.kz
Bul týraly Oqý-aǵartý mınıstrligi Balalardyń quqyqtaryn qorǵaý komıteti tóraǵasynyń orynbasary Dýlat Jekebaev aıtty.
«Balalardy qaýipsiz tasymaldaý - bizdiń baqylaýymyzdaǵy mańyzdy máselelerdiń biri jáne biz osy máseleni únemi kóterip kelemiz. Bıyl Balalar jyly aıasynda qaýipsizdik talaptaryna saı keletin 515 jańa avtobýs satyp alý úshin respýblıkalyq búdjetten aqsha bólindi. Jańa avtobýstar qaýipsizdik beldikterimen, mektep sómkesine arnalǵan sórelermen, esikteri ashyq kezde qozǵalysty tejeıtin mehanızmmen jáne taǵy da basqa qaýipsizdik quraldarymen jabdyqtalǵan», – dedi Dýlat Jekebaev.
Komıtet tóraǵasynyń orynbasary avtobýstardy satyp alýǵa bólingen qarjyny ıgerý jergilikti ákimdikterdiń quzyretinde ekendigin aıtady. Qoǵamdyq kólikter elimizde qurastyrylatyn bolǵandyqtan, qomaqty tapsyrys otandyq avtoóndiris salasyn damytýǵa da úlken úles qosatynyna senimdi.
Sózinshe, eń bastysy, balalarǵa qaýipsiz, jaıly avtobýstarmen qatynaýǵa jaǵdaı jasalady.
«Jańa avtobýstar Aqmola, Aqtóbe oblystary sıaqty birqatar óńirge jetkizilip, taratylyp jatyr. Biz elimizdiń barlyq aımaǵyndaǵy mektep avtobýstaryn kezeń-kezeńimen jańartamyz. Birinshi kezekte problema bar óńirlerdi avtobýspen qamtýdy josparlap otyrmyz. Máselen, 515 avtobýstyń 101-i Túrkistan oblysyna jóneltiledi», – Dýlat Jekebaev.