Robot «Qara jorǵa» bıin bıleıdi
Atyraý oqýshylary bıleıtin robot qurastyryp shyǵardy. Robot kúrdeli qımyl-qozǵalystardy jasaı alady, dep habarlaıdy Almaty-akshamy.kz QazAqparatqa silteme jasap.
Atyraýdaǵy Abaı ortalyǵynda 7-11 synyp oqýshylary úshin tegin STEAM kýrsy bar. Munda mektep oqýshylary túrli robottar qurastyryp, ǵylymı jobalarmen aınalysady. Máselen, JasSpace keńistiginde qosymsha bilim alyp júrgen Qurmet Áıipqalıev pen Dámeli Kishibaı bıleıtin robot qurastyrǵan. Qurmet munaıly shahardaǵy №28 mekteptiń 7-synybynda, al Dámeli APEC kolejiniń 1-kýrsynda oqıdy.
«Biz bıleıtin robotty qurastyrýǵa eki aı ýaqytymyzdy jumsadyq. Robottyń birneshe ereksheligi bar. Birinshiden, robot «Qara jorǵa» bıin bıleıdi. Ekinshiden, aınaladaǵy adamdarmen baılanys jasaıtyn múmkindigi bar. Úshinshiden, kúrdeli qımyl-qozǵalysty jasaı alady. Tórtinshiden, etnostıldegi robot últradybystyq dachık arqyly qosylady», - dep túsindirdi Dámeli Kishibaı.
Oqýshylardy ónertapqyshtyqqa Dıar Ábýhanov baýlyp júr. Onyń aıtýynsha, oqýshylardyń robot qurastyrýǵa qyzyǵýshylyǵy zor. Buǵan teorıadan góri praktıkalyq jumysqa basymdyq berý septigin tıgizgen.
«Shetelde jańa tehnologıaǵa, ásirese, túrli robottar qurastyrýǵa basa den qoıylyp otyr. Robot adam eńbegin almastyryp jatyr. Bolashaqta Qazaqstannyń jas ónertapqyshtary básekege qabiletti jańa tehnologıalar oılap tabatynyna senemin. Al, biz bastapqyda robotty kartonnan daıyndap, tekserip kórdik. Keıin maketti penopleksten jasap shyǵardyq. Basqarý baǵdarlamasyn ázirlep, ony ardýıno platasyna quıdyq. Sóıtip, tetikti basqanda, robot bıleıtindeı múmkindik jasadyq. Munan soń robotty odan ári jetildirýdi oılastyrdyq. Qazir robot rolık arqyly qozǵalady. Endi ony aıaǵymen júrip, adamnyń qımyl-áreketin kóbirek jasaıtyndaı etkimiz keledi», - dep aldaǵy josparymen bólisti Qurmet Áıipqalıev.
Eske sala ketelik, budan buryn atyraýlyq oqýshy qyz asaý úıretip, at ústinen sadaq atatynyn habarlaǵan bolatynbyz.