Bul týraly Oqý-aǵartý mınıstrliginiń baspasóz qyzmeti málimdedi.
Búginde sıfrlyq nusqadaǵy oqýlyqtar memlekettik saraptamadan ótip, oqý-ádistemelik keshender tizimine engizilgen, dep habarlaıdy Almaty-akshamy.kz.
Sıfrlyq oqýlyqtardy ázirleýge elimizdiń 11 baspasy tartyldy. Pánderdi oqytýdyń ınovasıalyq tásilderin engizý maqsatynda pedagogter úshin ádistemelik usynymdar ázirlengen.
«Qazirgi kúni elimizdegi bastaýysh synyp oqýlyqtarynyń – 94 paıyzy, 5-9 synyp oqýlyqtarynyń – 81 paıyzy, 10-11 synyp oqýlyqtarynyń 61 paıyzy elektrondy nusqaǵa kóshirildi. 2024 jyly pánderdi sıfrlyq oqýlyqtarmen 100% qamtý josparlanǵan», – deıdi Orta bilim komıtetiniń tóraǵasy Qanybek Jumashev.
Elektrondyq oqýlyqtarmen qatar mektepterde qosymsha oqý materıaly retinde mýltımedıalyq kontenti bar sıfrlyq bilim berý resýrstary belsendi qoldanylyp keledi. Qazirgi kúni 50 myńnan asa sıfrlyq bilim berý resýrsy jasalǵan.
2023 jyldyń basynan sıfrlyq bilim berý resýrstaryna 6,7 myń mektep qosyldy. Bul resýrstardy búginde kún saıyn 3 mıllıonǵa deıin oqýshy men muǵalim qoldanyp keledi. Sıfrlyq bilim resýrstarynda barlyq synyptardy qamtıtyn 50 myńnan asa vıdeosabaq jarıalanǵan.